Царква
Ня йдзі за большасьцю на благое і не вырашай цяжбіны, адступаючы з большасьцю ад праўды
(Выхад 23:2)
Галоўная Навіны за 2011 год
Памер шрыфту

19.04.2011

Дзясяткі тысячаў вернікаў Малабарскай Царквы разьвіталіся з сваім Першаярархам

Дзясяткі тысячаў вернікаў сабраліся ў нядзелю, 10 красавіка 2011 году, на пахаваньне зьверхніка Сірыйска-Малабарскай Царквы Індыі Варкея Вітхаятхіла. 84-гадовы кардынал, які на працягу апошніх гадоў быў таксама старшынёй Канферэнцыі Каталіцкіх Біскупаў Індыі, памёр ад сардэчнага прыступу 1 красавіка. Архібіскуп Цырыл Васіль, сакратар Кангрэгацыі Ўсходніх Цэркваў, прысутнічаў на пахаваньні Вярхоўнага Архібіскупа Сірыйска-Малабарскай Каталіцкай Царквы як прадстаўнік Рымскага Архірэя Бенядыкта XVI.

Kochi bids adieu to Cardinal
Kochi bids adieu to Cardinal

У сваім пасланьні ад 1 красавіка біскупам гэтай Ўсходняй Каталіцкай Царквы з нагоды сьмерці кардынала Вітхаятхіла, Папа сказаў: “Я з удзячнасьцю ўзгадваю адданасьць кардынала і яго служэньне Сірыйска-Малабарскай і Паўсюднай Царкве. Я далучаюся да вас і ўсіх, хто сумуе па ім, у тым ліку членаў сям’і спачылага кардынала, і даручаю яго душу бязьмежнай міласэрнасьці Бога і нашага любячага Айца”.
 
Кардынал Варкей Вітхаятхіл вылучаўся адкрытасьцю да людзей іншых рэлігіяў і розных палітычных поглядаў. Ён шчыра верыў у дыялог і братэрскую еднасьць, быў вялікім інтэлектуалам, простым у жыцьці. Незадоўга перад сьмерцю ў адным з інтэрв’ю кардынал Вітхатхіл сказаў: “Я ня маю ворагаў сярод пасьлядоўнікаў іншых веравызнаньняў, сярод маіх сьвятароў або нейкіх іншых групаў ці палітычных партыяў. Яны ведаюць, што я шчыра люблю ўсіх, хоць я і не магу пагадзіцца з ідэалогіяй некаторых з іх”. Кардынал Освальд Грасіяс, архібіскуп Мумбаі і цяперашні старшыня Канферэнцыі Каталіцкіх Біскупаў Індыі, сказаў на пахаваньні: “Мы павінны захоўваць яго бачаньне рэчаў, насьледуючы ягонаму прыкладу”.

На жалобных урачыстасьцях прысутнічалі біскупы лацінскага абраду і Сірыйска-Маланкарскай Царквы, а таксама прадстаўнікі іншых хрысьціянскіх канфесіяў, шматлікія сьвятары і рэлігійныя дзеячы. Усяго на пахаваньне Першаярарха Сірыйска-Малабарскай Каталіцкай Царквы сабраліся 72 біскупы і больш за 1500 сьвятароў. Былі таксама і палітычныя дзеячы і члены ўраду Індыі. Свае спачуваньні накіраваў прэзідэнт Індыі Працібху Паціл і прэм’ер-міністар краіны Манмахан Сінгх.

Шматлюдную цырымонію разьвітаньня з Першаярархам Сірыйска-Малабарскай Царквы ўзначаліў біскуп Боска Путхур, часовы Адміністратар гэтай Царквы. Труна з целам спачылага зьверхніка Малабарский Царквы было вынесена на вуліцу перад храмам, а пасьля яго перанесьлі ў крыпту базылікі сьв. Марыі ў Кочы. Людзі з розных рэлігіяў аддалі даніну пашаны кардыналу Варкею Вітхаятхілу ў катэдры Сьвятой Марыі ў Кочы.

 

 

 

Сістэма Orphus
Гэты артыкул чыталі 218 разоў (-ы)