Царква
I зноў я пабачыў пад сонцам, што ня ўвішным пасьпяховы бег дастаецца, не адважным - перамога, ня мудрым - хлеб, і не ў разумных - багацьце, і ня ўмельцам - прыхільнасьць, а ад пары й нагоды залежаць яны
(Кніга Эклезіяста 9:11)
Галоўная Навіны за 2012 год
Памер шрыфту

02.03.2012

Ніхто і нішто ня можа адмяніць запаведзі Божыя

Рашэньне пра перанос урадам Беларусі, у сувязі з сьвяткаваньнем 8 сакавіка, працоўнага дня на нядзелю, хрысьціянскія Цэрквы Беларусі ўспрынялі са зьдзіўленьнем і неразуменьнем.
  
У Беларусі, усьлед за Расеяй, працоўны дзень з пятніцы, 9 сакавіка, пераносіцца на нядзелю, 11 сакавіка. Кіраўнік краіны А. Лукашэнка 1 сакавіка падпісаў аб гэтым адпаведны указ № 119. Такі перанос выклікаў неразуменьне ў многіх вернікаў розных хрысьціянскіх канфесіяў Беларусі, для якіх нядзеля – гэта сьвяты дзень, прысьвечаны Богу. Варта адзначыць, рашэньне беларускіх уладаў зрабіць нядзелю, 11 сакавіка, працоўным днём тым больш дзіўнае, бо спачатку ўрадам планавалася разумнае рашэньне – зрабіць працоўным днём суботу, 17 сакавіка.
 
Сёмы дзень тыдня хрысьціяне традыцыйна прысьвячаюць Богу. У гэты дзень яны прыходзяць у храмы на набажэнствы, наведваюць хворых, дапамагаюць блізкім, адпачываюць у коле сваёй сям’і.
 
Шкадаваньне адносна такога пераносу працоўнага дня на нядзелю зьвязана яшчэ і з тым, што прапанаваныя ўрадам 3-дзённыя сьвяткаваньні 8 сакавіка адбываюцца ў дні Вялікага посту, які вельмі важны ў рэлігійным жыцьці хрысьціянаў як усходняй, так і заходняй традыцыі. У гэты час Царква заклікае да паўстрыманасьці, ня ладзіць забавы і гучныя сьвяткаваньні, а ўзмацніць малітвы, часьцей бываць на набажэнствах, найперш нядзельных. Для людзей, якія працуюць, нядзеля – гэта, часта, адзіны дзень, калі ў іх ёсьць магчымасьць прыняць удзел у Боскай літургіі. На жаль, беларускія ўлады не прапануюць такіх доўгіх сьвяткаваньняў падчас Пасхі, і сваім рашэньнем аб пераносе працоўнага дня на нядзелю яны выказалі непавагу да рэлігійных пачуцьцяў мільёнаў беларускіх вернікаў.
 
У каментарах для СМІ адносна пераносу працоўнага дня на нядзелю адмоўна да гэтага паставіліся як у прэс-службе Беларускай Праваслаўнай Царквы, так і ў сакратарыяце Канферэнцыі каталіцкіх біскупаў Беларусі.
 
“Нішто ня можа адмяніць запаведзі Божыя. У нас шмат выпадкаў, калі людзей прымушаюць працаваць у выходныя. Вядома, гэта дрэнна. Вядома, мы гэта не падтрымліваем, – падзяліліся з Tut.by у прэс-службе БПЦ.
 
Прэс-сакратар Менскай япархіі Беларускай Праваслаўнай Царквы а. Сяргей Лепін так пракаментаваў для “Комсомольской правды” рашэньне ўладаў: “Вельмі шкада, што 8 сакавіка для нашых людзей важней, чым нядзеля. У Царкве па-ранейшаму будуць чакаць вернікаў у гэты дзень на набажэнствы. Нядзеля – гэта маленькі Вялікдзень. Нядзеля ніколі не перастае быць нядзеляй, гэты дзень заўсёды прысьвечаны Богу”.
 
Не падтрымліваюць перанос працоўнага дня на нядзелю і ў сакратарыяце Канферэнцыі каталіцкіх біскупаў Беларусі: “Вядома, гэта ненармальна. Мы ведаем, што нядзеля – гэта дзень для сям’і, для адпачынку. А тут усё перакручваецца. Зразумела, ні з якімі пратэстамі і апеляцыямі мы выступаць ня будзем, але гэта ненатуральна”.
 
У інтэрв’ю Kp.by выканаўца абавязкаў прэс-сакратара Канферэнцыі Каталіцкіх Біскупаў у Беларусі сьвятар Юры Санько адзначыў: “Можна было зрабіць працоўным днём наступную суботу. Даўно ўжо пара, каб у нашай сьвядомасьці нядзеля стала днём для сям’і. У першую чаргу, вядома, для Бога. Пасьля таго, як вернік сходзіць у храм, ён праводзіць нядзелю са сваёй сям’ёй. А калі вырываюць з тыдня дзень для душы, атрымліваецца, што тыдзень становіцца цалкам бездухоўным”. Каталіцкі сьвятар таксама падкрэсьлівае, што цяпер час Вялікага посту, а Царква навучае ў гэты час не ладзіць вялікіх сьвяткаваньняў.
 
Што ж рабіць вернікам у сувязі з пераносам працоўнага дня на нядзелю? Згодна з навукай Каталіцкай Царквы вернікі ў нядзелю і ў іншыя ўстаноўленыя сьвяточныя дні павінны ўстрымлівацца ад выкананьня працы або дзейнасьці, якія перашкаджаюць належнаму ўшанаваньню Бога, зьдзяйсьненьню ўчынкаў міласэрнасьці і неабходнаму духоўнаму і фізічнаму адпачынку. Прэс-сакратар епіскапату Беларусі сьвятар Юрый Санько заўважае, што праца ў гэты дзень ня будзе лічыца грахом: “Людзі не самі дабраахвотна гэта абралі, па сутнасьці, іх прымушаюць працаваць. Але ўсё адно можна паспрабаваць увечары ці раніцай патрапіць на набажэнства. У некаторых касьцёлах нядзельная Імша праходзіць у суботу ўвечары”.
 
Варта заўважыць, што Працоўны кодэкс Рэспублікі Беларусь гарантуе грамадзянам адпачынак у нядзелю. У частцы 11 Закону запісана: “У мэтах рацыянальнага выкарыстаньня працоўнага часу, выходных дзён, дзяржаўных сьвят і сьвяточных дзён (частка 1 арт. 147) Урад Рэспублікі Беларусь па ўзгадненьні з Прэзідэнтам Рэспублікі Беларусь можа пераносіць асобныя працоўныя дні на выходныя дні, якія прыходзяцца на суботу”. І толькі “у выключных выпадках нядзеля можа быць абвешчана працоўным днём Прэзідэнтам Рэспублікі Беларусь” (у рэд. Закона Рэспублікі Беларусь ад 20.07.2007 № 272-З). Аднак тады паўстае пытаньне: у сувязі з чым сёлета нядзеля 11 сакавіка стала такім выключным выпадкам?
 
Нішто і ніхто ня можа адмяніць запаведзі Божыя. На жаль, у сучаснай Беларусі ёсьць шмат выпадкаў, калі людзей прымушаюць працаваць у выходныя як на дзяржаўных, так і на прыватных прадмпрыествах.
 
Тым ня менш, шэраг буйных прадпрыемстваў краіны скарысталіся ў адпаведнасьці з заканадаўствам правам самастойна вызначыць, на які дзень пераносіць працоўны дзень. Так, прэс-служба ААТ “БЕЛАЗ” паведамляе, што кампанія перанесла працоўны дзень з 9 сакавіка на 3 сакавіка. Такое ж рашэньне прынялі ў ААТ “Інтэграл” і ў шэрагу невялікіх працоўных калектывах.
 
З пашанай да вернікаў паступілі сёлета і ва Ўкраіне: там адпачываюць з 8 па 11 сакавіка, а каб не пераносіць працоўны дзень на нядзелю, працоўным днём абвешчана субота, 3 сакавіка.
Сістэма Orphus
Гэты артыкул чыталі 873 разоў (-ы)