Царква
Дабрашчасныя міласэрныя, бо яны памілаваны будуць
(Паводле Мацьвея Сьвятое Дабравесьце 5:7)
Галоўная Навіны за 2012 год
Памер шрыфту

09.12.2012
З Катэхізмам УГКЦ пазнаёміліся ярархі Ўсходніх Каталіцкіх Цэркваў
 
На штогадовай сустрэчы ярархаў Каталіцкіх Цэркваў усходняга абраду (ССЕЕ), якая адбылася ў Заграбе (Харватыя) 22-25 лістапада 2012 году з нагоды 400-годдзя уніі Грэка-Каталіцкай Царквы Харватыі з Рымам, Вярхоўны Архібіскуп УГКЦ Сьвятаслаў Шаўчук прадставіў біскупам Катэхізм УГКЦ “Хрыстос — наша Пасха”, паведамляе Дэпартамент інфармацыі УГКЦ.
 
Першаярарх УГКЦ падчас прэзентацыі катэхізму 60 ярархам, якія прысутнічалі на сустрэчы ў Заграбе, адзначыў: “Гэтая кніга, праз якую Царква прадстаўляе сваё вучэньне пра веру і мараль, зьяўляецца адказам на “Катэхізм Каталіцкай Царквы”, 20-годдзе апублікаваньня якога мы адзначаем сёлета і які стаў штуршком для мясцовых Цэркваў, каб распрацаваць свае катэхізмы”.
 
Праца над Катэхізісам УГКЦ ішла на працягу апошніх 10 гадоў. Паводле словаў Першаярарха УГКЦ Вярхоўнага Архібіскупа Сьвятаслава Шаўчука, мэта гэтага катэхізму — дапамагчы ўкраінскім грэка-католікам паглыбіць веды пра веру ў Хрыста і, адпаведна, умацаваць іх веру; абараняць і разьвіваць хрысьціянскую традыцыю сьвятога Ўладзіміра; сьведчыць пра сувязь паміж хрысьціянскай традыцыяй Кіева і каталіцкім хрысьціянствам.
 
Навука Грэка-Каталіцкай Царквы выкладзена ў гэтым катэхізме на 336 старонках (з 64 ілюстрацыямі) у трох частках: вера Царквы, малітва Царквы і жыцьцё Царквы. Абапіраючыся на традыцыю Кіеўскай Царквы, гэты катэхізм адначасова адкрыты на сучаснасьць. Ён дапамагае вернікам у пошуку ўласнай ідэнтычнасьці ў сучасным сьвеце з яго выклікамі глабалізацыі і асіміляцыі, дазваляе больш глыбока спазнаць свае хрысьціянскія карані, ведаючы якія яны змогуць адкрыць для сябе ўніверсальную вартасьць усходняй традыцыі.
 
Ухвалены Сінодам біскупаў Украінскай Грэка-Каталіцкай Царквы Катэхізм “Хрыстос — наша Пасха” быў ператлумачаны таксама на расейскую, ангельскую і італійскую мовы. Пераклад гэтага катэхізму будзе зроблены і на іншыя мовы, на якіх размаўляюць вернікі УГКЦ у сьвеце.
Сістэма Orphus
Гэты артыкул чыталі 76 разоў (-ы)