Царква
Калі маю дар прароцтва, і ведаю ўсе таямніцы, і маю ўсякія веды і ўсю веру, так што магу і горы перастаўляць, а ня маю любові, - дык я нішто
(Пасланьне сьв. ап. Паўла да Карынфянаў 13:2)
Галоўная Навіны за 2013 год
Памер шрыфту

25.01.2013
Апостальскі экзархат УГКЦ у Францыі ўзвышаны да годнасьці япархіі
 
Як паведаміла Ватыканская інфармацыйная служба VIS, 19 студзеня 2013 году, на сьвята Богазьяўленьня паводле юльянскага календара, Папа Бенядыкт XVI узвысіў Апостальскі экзархат для ўкраінцаў візантыйскага абраду ў Францыі да статусу япархіі, якая атрымала назву Парыжскай япархіі сьвятога Ўладзіміра Вялікага для ўкраінцаў візантыйскага абраду (Saint Wladimir-Le-Grand de Paris des Byzantins-Ukrainiens).
 
Адначасова Сьвяты Айцец прызначыў першым япархам Парыжскай япархіі сьвятога Ўладзіміра Вялікага 52-гадовага Ўладыку Барыса Гудзяка, які дагэтуль быў тытулярным біскупам Каркабіі і зьяўляўся Апостальскім экзархам у Францыі. (Апостальскі экзархат зьяўляецца адпаведнікам Апостальскага вікарыяту ў лацінскім абрадзе.) Ён таксама будзе апекавацца ўкраінскімі католікамі візантыйскага абраду ў краінах Бенілюкса і Швейцарыі.
 
Апостальскі нунцый у Францыі архібіскуп Луіджы Вентура зрабіў афіцыйнае абвяшчэньне пра гэтае рашэньне Апостальскага Пасаду пасьля Архірэйскай Літургіі ў грэка-каталіцкай катэдры сьв. Уладзіміра Вялікага ў Парыжы, якую ўзначальваў Уладыка Барыс (Гудзяк).
 
Рэлігійна-інфармацыйная служба Ўкраіны РІСУ прыводзіць словы з інтэрв’ю новага ўкраінскага грэка-каталіцкага япарха ў Парыжы: “На пачатку новага тысячагоддзя, пасьля стагоддзя лютых перасьледаваньняў, Боскі Провід расьсеяў украінскіх грэка-католікаў па сьвеце з духоўнай і царкоўнай мэтаю. Мы спадзяемся, што ў секулярызаванай Еўропе дзеці мучанікаў змогуць творча і пераконліва сьведчыць вечную ісьціну Евангельля Ісуса Хрыста. Мы дзякуем Сьвятому Айцу Бенядыкту, Папе Рымскаму, Яго Блаславенству Сьвятаславу, Айцу і Галаве Ўкраінскай Грэка-Каталіцкай Царквы, і Сіноду за давер, які яны выявілі да духавенства, манаства і вернікаў гэтай новай япархіі”.
 
 
Распавядаючы пра месца новай япархіі ў Царкве ў Еўропе, біскуп Барыс Гудзяк адзначыў: “Я сьмею думаць, што з Божай персьпектывы Царква ў Еўропе ўсё яшчэ вельмі маладая. Я спадзяюся, што стварэньне новай япархіі будзе спрыяць яе росту і жыцьцяздольнасьці напряцягу найбліжэйшых стагоддзяў і тысячагоддзяў”.
 
Сталая прысутнасьць украінскіх грэка-католікаў у Францыі пачынаецца з 1937 году, калі для іх была заснавана грэка-каталіцкая місія, У 1943 годзе ёй была перададзена царква на бульвары Сен-Жэрмэн, якая пазьней стала ўкраінскай грэка-каталіцкай катэдрай сьвятога Ўладзіміра Вялікага.
 
Экзархат Украінскай Грэка-Каталіцкай Царквы з рэзідэнцыяй у Парыжы быў заснаваны 22 ліпеня 1960 году. Першым экзархам быў прызначаны тагачасны Протаігумен айцоў-рэдэмптарыстаў у Канадзе а. Валадымір Маланчук. Тады тэрыторыя экзархату абмяжоўвалася толькі Францыяй, пазьней, з прызначэньнем другога экзарха, Уладыкі Міхаіла Грынчышына, яго душпастырскай апецы былі даручаны таксама ўкраінскія грэка-католікі, якія жывуць у Бельгіі, Нідэрландах, Люксембургу і Швайцарыі.
 
Паводле інфармацыі Ватыканскай інфармацыйнай службы новая япархія УГКЦ сьв. Уладзіміра Вялікага з рэзідэнцыяй у Парыжы сёньня ахоплівае каля 25200 вернікаў, душпастырскай апекай якіх займаюцца 16 сьвятароў, 1 сталы дыякан і 5 прадстаўнікоў манаства. Тэрыторыя новай япархіі ў 5 краінах падзелена на 18 парафіяў.

Украінская грэка-каталіцкая япархія сьв. Уладзіміра Вялікага з цэнтрам у Парыжы ўжо трэцяя япархія для католікаў усходняга абраду ў Францыі. Раней там былі створаныя дзьве япархіі для армяна-католікаў і вернікаў Мараніцкай Царквы.
 
Першы біскуп новастворанай япархіі сьв. Уладзіміра Вялікага ў Парыжы Ўладыка Барыс Гудзяк нарадзіўся ў 1960 годзе ў ЗША. Там жа атрымаў асьвету ў Сіракузскім універсітэце, стаў бакалаўрам біялогіі і філасофіі. Затым здабыў ступень доктара па гісторыі славянскай і візантыйскай культуры ў Гарвардзкім універсітэце. Багаслоўскія студыі завершыў у Рыме ў Папскім Урбаніянскім універсітэце (1980-1983) і Папскім Усходнім інстытуце (1994-1995), дзе атрымаў ступень ліцэнціята ўсходняга багаслоўя.
 
У 1992 годзе Барыс Гудзяк прыехаў у Львоў, дзе стаў заснавальнікам Інстытуту гісторыі Царквы, які ўзначальваў да 2002 году. У 1993 годзе тагачасны Першаярарх УГКЦ Міраслаў Любачыўскі прызначыў яго старшынём камісіі па аднаўленьні Львоўскай багаслоўскай акадэміі, у якой ён з 1995 году быў віцэ-рэктарам, а з 2000 году — рэктарам. На аснове акадэміі ў 2002 годзе быў заснаваны Ўкраінскі каталіцкі ўніверсітэт, а першым рэктарам быў прызначаны а. Барыс Гудзяк, які ў 1998 годзе прыняў сьвятарскія сьвячаньні.
 
21 ліпеня 2012 году Сьвяты Айцец Бенядыкт XVI прызначыў а. Барыса Гудзяка Апостальскім экзархам для ўкраінцаў грэка-католікаў у Францыі. Яго хіратонія адбылася 26 жніўня 2012 году ў архікатэдры сьв. Юра ў Львове, а інтранізацыя — 2 сьнежня 2012 году ў катэдры Парыжскай Божай Маці.
 
Уладыка Барыс Гудзяк зьяўляецца вядомым гісторыкам Царквы, ён — аўтар звыш 50 навуковых прац і публікацыяў пра гісторыю Царквы, пра багаслоўскую асьвету і на розныя тэмы грамадзка-культурнага характару. Найбольш вядомая яго праца — “Crisis and Reform: The Kievan Metropolitanate, the Patriarchate of Constantinople, and the Genesis of the Union of Brest” (па-ўкраінску: “Київська митрополія, Царгородський патріархат і генеза Берестейської унії”).
 
Сістэма Orphus
Гэты артыкул чыталі 72 разоў (-ы)