Памінальная малітва за беларускага настаўніка ў Магілёве У Магілёве 10 чэрвеня 2017 году, напярэдадні Нядзелі ўсіх сьвятых, грэка-каталіцкі сьвятар узначаліў памінальную малітву на магіле настаўніка, які закладаў у горадзе беларускамоўнае школьніцтва на пачатку 1920-х гадоў.
15.06.2017
У Вільні гучалі беларускія царкоўныя сьпевы 10 чэрвеня 2017 году ў Вільні, у старажытнай царкве Сьвятой Тройцы айцоў-базыльянаў, адбылася беларуская літургія і канцэрт духоўнай музыкі, на якім з беларускімі царкоўнымі сьпевамі выступіў грэка-каталіцкі хор «Прасфара» з Менску.
31.05.2017
Ва Ўкраіне смутак — памёр былы першаярарх УГКЦ 31 траўня 2017 году, на 85 годзе жыцьця адышоў у вечнасьць Яго Блаславенства Любамір кардынал Гузар, былы Вярхоўны архібіскуп Кіева-Галіцкі — паведамляе Дэпартамент інфармацыі УГКЦ.
Базыльяне з Украіны наведалі Беларусь З нагоды 400-х угодкаў Ордэну базыльянаў група студэнтаў 1-2 курсаў Базыльянскага інстытуту філасофска-багаслоўскіх студыяў імя Мітрапаліта Язэпа Вельяміна-Руцкага разам з сваімі настаўнікамі з манастыра сьв. Язэпа ў Львове ў канцы красавіка 2017 году наведала мясьціны, зьвязаныя з гісторыяй базыльянаў у Беларусі.
Папа Францішак і копцкі праваслаўны патрыярх падпісалі сумесную дэкларацыю Папа Францішак і Патрыярх Копцкай Праваслаўнай Царквы Тавадрас ІІ падпісалі сумесную дэкларацыю аб прадаўжэньні шляху да поўнай еўхарыстычнай еднасьці і сулучнасьці паміж Цэрквамі. Гэта адбылося вечарам, 28 красавіка 2017 году, на завяршэньне сустрэчы паміж першаярархамі ў каірскай рэзідэнцыі копцкага праваслаўнага патрыярха, паведамляе Беларуская рэдакцыя Ватыканскага радыё.
Сьвятар, які служыў у Беларусі, прызначаны кіруючым біскупам грэка-каталіцкай япархіі ў Чыкага У Ватыкане 20 красавіка 2017 году было паведамлена, што Папа Францішак блаславіў рашэньне Сіноду Біскупаў Украінскай Грэка-Каталіцкай Царквы аб прызначэньні біскупа-памочніка Львоўскай архіяпархіі Ўладыкі Бенядыкта (Алексійчука) кіруючым біскупам грэка-каталіцкай япархіі сьвятога Мікалая з сядзібай у Чыкага (ЗША), перанёсшы яго з тытулярнага пасаду Германіціяні. Амаль тры гады будучы ўкраінскі грэка-каталіцкі ярарх нёс сьвятарскае служэньне ў Беларусі.
Папа ягіпецкім католікам: «ня бойцеся адкрыць свае сэрцы», будзьце будаўнікамі мастоў, дыялогу і згоды
Богапасьвячаныя асобы «маленькага каталіцкага статку ў Ягіпце, разам з нашымі братамі праваслаўнымі, зьяўляюцца закваскай, якую Бог падрыхтаваў для гэтай блаславёнай зямлі, каб узрастала на ёй Ягонае Валадарства», падкрэсьліў Папа Францішак 29 красавіка 2017 году падчас сустрэчы з ягіпецкім духавенствам.
«Ня бойцеся штодзённага цяжару, цяжару складаных умоваў, праз якія некаторыя з вас павінны прайсьці. Мы ўшаноўваем Сьвяты Крыж, прыладу і знак нашага збаўленьня. Хто ўцякае ад крыжа, той уцякае ад Уваскрасеньня!» — цытуе словы Рымскага Архірэя Беларуская рэдакцыя Ватыканскага радыё.
Разам з тым Сьвяты Айцец Францішак заклікаў каталіцкіх сьвятароў і манаства ў іх духоўным служэньні не паддавацца расчараваньню і песімізму, каб выступалі з новымі ініцыятывамі і былі крэатыўнымі, суцяшалі і былі бацькамі, нават калі ня бачаць удзячнасьці. Як адзначае Каталіцкае інфармацыйнае агенцтва (КАІ), Папа перасьцярог перад спакусамі пастаяннага нараканьня і абвінавачваньня іншых, перад пляткарствам і зайздрасьцю, параўноўваньнем сябе з іншымі, што можа прывесьці да спыненьня ўласнага дзеяньня і да адасабленьня ад людзей.
Яшчэ адна пагроза на думку Францішка — гэта «фараонcтва», зацьвярдзеласьці сэрца і закрытасьці яго на Бога і бліжніх. Яна зьвязаная з адчуваньнем сябе вышэйшымі за іншых, з жаданьнем панаваць над іншымі і падпарадкоўваць іх сабе, каб усе служылі табе. Лекам на гэтую атруту, паводле словаў Папы, ёсьць напамін з Евангельля: «Хто хоча быць першым, хай будзе апошнім з усіх і слугою ўсім!» (Мк 9, 35). Гэта ўсё ёсьць таксама спакуса індывідуалізму, калі падчас дарогі губляецца мэта і замест каб думаць пра іншых, думаеш адно пра сябе, кіруючыся ягіпецкай показкай: «галоўнае я, а пасьля мяне хоць патоп». Гэта спакуса эгаістаў, а Царква, падкрэсьліў Сьвяты Айцец, ёсьць супольнасьцю вернікаў, Целам Хрыстовым, дзе збаўленьне аднаго члена зьвязанае з сьвятасьцю ўсіх (пар. 1 Кар 12, 12-27; «Lumen gentium», 7).
Папа зьвярнуў увагу на неабходнасьць захаваньня сваёй тоеснасьці як дзяцей Царквы копцкага абраду, важнасьці трымацца ўласнай багатай і старажытнай спадчыны і каранёў, і адначасова быць каталікамі паводле ідэнтычнасьці — гэта значыць, быць часткаю адзінай і Паўсюднай Царквы.
«Чым больш мы ўкаранёныя ў Хрысьце, тым больш жывыя і плённыя», — сказаў Папа і дадаў, што ад якасьці духоўнага жыцьця богапасьвячаных асобаў залежыць якасьць іх служэньня. Ён заклікаў чэрпаць натхненьне з прыкладу шматлікіх сьвятых манахаў-пустэльнікаў, якія менавіта на тэрыторыі Ягіпту далі пачатак манаскаму жыцьцю. «Таксама і вы зможаце быць сьвятлом і сольлю, гэта значыць весьці да збаўленьня саміх сябе і ўсіх іншых, веруючых і няверуючых, і асабліва для апошніх, убогіх, пакінутых і нікому не патрэбных», — сказаў Папа Францішак.
Сустрэча з ягіпецкім каталіцкім духавенствам стала апошняй у праграме Апостальскага візіту Сьвятога Айца ў гэтую паўночнаафрыканскую краіну. А перад гэтым Папа сустрэўся з ягіпецкай каталіцкай моладдю і адслужыў сьв. Літургію 29 красавіка на стадыёне ягіпецкіх Ваенна-паветраных сіл на ўскраіне Каіру.
Разам з Рымскім Архірэем маліўся зьверхнік Копцкай Каталіцкай Царквы Патрыярх Александрыі Яго Блаславенства Ібрагім Ісак Сідрак і прадстаўнікі іншых каталіцкіх Цэркваў Ягіпту. У набажэнстве з Папам Рымскім прынялі ўдзел больш за 20 тыс. асобаў: сярод іх былі ня толькі каталікі, але і праваслаўныя копты і мусульмане. Боская Літургія з рознымі копцкімі сьпевамі правілася па-арабску і на лаціне.
«Богу падабаецца толькі вера, якую вызнаюць жыцьцём, таму адзіным экстрэмізмам, дапушчальным для вернікаў, зьяўляецца радыкалізм любові! Любыя іншыя экстрэмізмы не паходзяць ад Бога, і не даспадобы Яму!» — сказаў Папа Францішак падчас сьв. Літургіі на стадыёне ягіпецкіх Ваенна-паветраных сіл перад мноствам вернікаў. Сьвяты Айцец заклікаў: «Ня бойцеся адкрыць свае сэрцы на сьвятло ўваскрослага Госпада і дазвольце, каб Ён перамяніў вашую няўпэўненасьць у сілу, пазітыўную для вас і для іншых. Ня бойцеся любіць усіх, прыяцеляў і ворагаў, бо калі жывеш у любові, у ёй ёсьць сіла і скарб чалавека, які верыць!».
Ягіпецкія католікі складаюць меньшасьць у хрысьціянскай меншасьці краіны. Агулам католікаў налічваецца больш за 250 тыс. Самую вялікую супольнасьць у Каталіцкай Царкве розных абрадаў у гэтай краіне складаюць католікі копцкага абраду, іх ёсьць каля 220 тысячаў.