ISBN 978-985-6448-43-3

Выданьне зьмяшчае традыцыйны Псалтыр і выбраныя біблійныя песьні ў сучасным перакладзе з старагрэцкай мовы айца Аляксандра Надсана. Прызначана як для выкарыстаньня ў царкоўнай службе, так і для асабістай малітвы хрысьціянаў розных канфесій.

У візантыйскім абрадзе катызмы Псалтыра чытаюцца пры кожным ранішнім і вячэрнім богаслужэньні такім чынам, што ўвесь Псалтыр прачытваецца цягам тыдня, а падчас Вялікага посту — двойчы на тыдзень. Мноства прамых і прыхаваных цытатаў з псалмоў зьмяшчаецца ў тэкстах набажэнстваў Усходняе Царквы.

Псалтыр у далёкім мінулым ня толькі служыў настольнай кнігай кожнага адукаванага чалавека, але і быў часта яго неразлучным спадарожнікам у часы доўгатэрміновых вандровак і падарожжаў.

Псалтыр зьяўляецца кнігай паэзіі, сьпевам душы чалавека да Бога. Хрысьціянства, якое прыйшло на нашыя землі, адкрыла для нашага народу гэтую найпрыгажэйшую паэтычную кнігу Бібліі. Ва ўсходняй традыцыі Біблія на царкоўнаславянскай мове ў перакладзе з грэцкай Септуагінты стала крыніцаю ўмацаваньня ў веры нашых продкаў, повязьзю з Творцам праз вобразы і сюжэты паэтычных радкоў.

Найважнейшай падзеяй у гісторыі айчыннай біблістыкі і кнігадрукаваньня стала выданьне Францішкам Скарынам Псалтыра ў 1517 годзе. Да 500-годдзя гэтай падзеі прыйшоў да чытача і Псалтыр у перакладзе айца Аляксандра Надсана.

Новы пераклад Кнігі псалмоў з грэцкага тэксту Септуагінты, зьдзейсьнены а. Аляксандрам Надсанам, адгортвае новую старонку ў айчыннай біблістыцы, спрычыняецца да ўзбагачэньня агульнанацыянальнай хрысьціянскай спадчыны.

Каталіцкі сьвятар Сяргей Сурыновіч, які напісаў прадмову да перакладу Псалтыра а. Аляксандара Надсана і падрыхтаваў яго да друку, адзначыў: «Хочацца спадзявацца, што гэтае выданьне стане ня толькі помнікам чалавеку, які цягам жыцьця жыў Божым Словам, — айцу Аляксандру Надсану, але і крыніцай малітоўнага досьведу і праслаўленьня Бога для кожнага, хто з верай і пашанай прыступіць да гэтай Сьвятой Кнігі.