15.04.2009

Але пасьля рэканструкцыі ў ёй разьмесьціцца ня храм, а дзіцячая філармонія.  

Сапраўднае сэрца Менску — Стары горад. У 1990‑я на плошчы Свабоды быў адноўлены каталіцкі сабор. У 2004 адбудавалася Ратуша, пасьля — гатэль «Еўропа». На чарзе — яшчэ адзін элемент старадаўняй Ратушнай плошчы, царква Сьвятога Духа, збудаваная ў першай палове XVII ст. Яна належала да комплексу ўніяцкага, базыльянскага кляштару.

У 1795 г. базыльянскія манастыры былі зачынены, а царква аддадзена пад катэдральны праваслаўны Петрапаўлаўскі сабор. Пры цару яе перабудоўвалі на маскоўскі лад, а за саветамі ўвогуле збурылі. Захаваліся толькі падмуркі, на іх яна і паўстане зноў.

Пачатак аднаўленьня запланаваны на пачатак лета.

Адбудовай будзе займацца КУП «Мінская спадчына». Мае быць адноўлены гістарычны вобраз храму. Адно што скульптуры сьвятых на фасадзе вырашана замяніць на арнамент. Па словах Міхаіла Жыха,галоўнага інжынера «Спадчыны», існаваньне царквы ў якасьці філармоніі — добры факт, бо «помнікі не павінны станавіцца нагодай канфліктаў паміж канфесіямі».

Прадстаўнікі ўніяцкай канфесіі, якая тую царкву будавала, рэагуюць стрымана:

«Сам факт аднаўленьня гістарычнага помніка — гэта, канешне, добра, — кажа Андрэй Буйніч, грэка‑каталіцкі сьвятар. — Тое, што там будзе разьмешчана дзіцячая філармонія... Філармонія — гэта нейтральны аб’ект. Бо ці змогуць канфесіі ўтрымліваць гэтую царкву? Мы б таксама маглі атрымаць правы на гэтую царкву. Але я не хацеў бы, каб усе думалі, што хтосьці там супраць перадачы яе нам. Важна каб не царква, але мы самыя вырашылі, ці мы ў стане трымаць яе як царкву».

Працы пачнуцца адразу пасьля Вялікадня. Тэхнічная задача перад архітэктарамі стаіць няпростая: пад самымі падмуркамі царквы праходзіць лінія метро.

Паводле: Ганна Журавіна, "Наша Ніва".