24.03.2011

Як паведамляе РІСУ - Релігійно-інформаційна служба України паводле неафіцыйнай інфармацыі, на чацьвёрты дзень працы Выбарчага Сіноду УГКЦ, 24 сакавіка 2011 году, стала вядома, што ўкраінскія ярархі зрабілі выбар новага Зьверхніка Царквы. Аднак да моманту афіцыйнага пацьверджаньня гэтага выбару Апостальскім Пасадам у Рыме пра асобу новага Першаярарха УГКЦ пакуль не паведамлецца. Зараз у УГКЦ чакаюць адказу з Апостальскай сталіцы.

Як ужо паведамлялася, трэба атрымаць дзьве траціны галасоў, каб быць абраным. Паводле гэтай працэдуры галасаваньні на Сінодзе Біскупаў УГКЦ адбываліся на працягу трох дзён чатыры разы на дзень. Пасьля дванаццаці безвыніковых галасаваньняў паводле гэтай схемы Зьверхніка Царквы працэдура выбару спрашчаецца. Новага Зьверхніка УГКЦ выбіраюць простай большасьцю галасоў сярод двух кандыдатаў, якія набралі найбольш галасоў.
 
Згодна з правіламі, абраны біскуп павінен адправіць ўласнаручна ліст да Рымскага Архірэя для зацьвярджэньня выбараў. Пасьля атрыманьня зацьвярджэньня перад Сінодам Біскупаў ён складзе вызнаньне веры і абяцаньне дбайна выконваць сваё служэньне, а пасьля абвяшчэньня яго абраньня будзе праведзена інтранізацыя новага Першаярарха УГКЦ згодна з прадпісаньнямі літургічных кніг, пасьля чаго ён атрымае поўныя правы на сваё служэньне.
 
Удзел у працы Выбарчага Сіноду ўзялі 40 біскупаў з Украіны і з-за мяжы (Заходняй Еўропы, ЗША, Канады, Бразіліі, Аргентыны і Аўстраліі).
 
Інтранізацыя новага Зьверхніка УГКЦ адбудзецца 27 сакавіка, а 10.00 гадз., у новазбудаваным Патрыяршым саборы Ўваскрасеньня Хрыстова ў Кіеве. На цырымонію запрошаныя каля тысячы гасьцей. Гэта прадстаўнікі ўсіх япархіяў і экзархатаў УГКЦ, а таксама прадстаўнікі дзяржаўнай і мясцовай улады, мясцовых і міжнародных грамадзкіх арганізацыяў і розных канфесіяў і рэлігійных арганізацыяў.