Кардынал Крыстаф Шэнбарн у наступную сераду 13 красавіка 2011 году правядзе ў Рыме сусьветную прэзентацыю новага моладзевага катэхізму пад назвай “YouCat”. 
Новы Зьверхнік УГКЦ Уладыка Сьвятаслаў (Шаўчук), які знаходзіўся ў Рыме з візітам, мэта якога - засьведчыць поўную сулучнасьць з Рымскім Архірэем, 3 красавіка 2011 году адслужыў архірэйскую Боскую Літургію ў саборы Сьвятой Сафіі ў Рыме. 
Кардынал Вальтэр Каспэр заклікаў да “аднаўленьня літургічна-сакраментальнай культуры”. Літургію ня можна пастаянна “перарабляць”, сказаў былы старшыня Папскай Рады спрыяньня еднасьці хрысьціянаў на сімпозіюме, прысьвечаным літургіі, у нямецкім горадзе Фалендар. У сваю чаргу, цяперашні старшыня гэтай ватыканскай дыкастэрыі, швайцарскі кардынал Курт Кох лічыць, што неабходны новы літургічны рух. Ён павінен быць дастаткова моцным, каб абараніць добры плён пасьлясаборнага разьвіцьця літургіі і выправіць яго “цені”. 
“Я буду будаваць патрыярхат”, - так сказаў Зьверхнік УГКЦ Уладыка Сьвятаслаў (Шаўчук), адказваючы на пытаньне ўкраінскіх журналістаў, ці будзе ён называць сябе патрыярхам. 
Сусьветны Дзень моладзі сёлета пройдзе у Мадрыдзе (Гішпанія) з 16 па 21 жніўня. Сярод розных групаў моладзі з Беларусі з Менска рыхтуецца міжпарафіяльная група, якую зьбіраюць: рыма-каталіцкая парафія сьв. Яна Хрысьціцеля і грэка-каталіцкая парафія сьв. Міколы Цудатворцы. Адметнасьцю пілігрымкі стане наведваньне па дарозе экуменічнай супольнасьці ў Тэзэ (Францыя), дзе плануецца правесьці некалькі дзён і бліжэй даведацца пра духоўнасьць Тэзэ. 
У Менску ў ноч з 2 на 3 красавіка 2011 году маладыя вернікі сабраліся ў архікатэдры імя Найсьвяцейшай Марыі Панны на супольную малітву, каб ушанаваць памяць Вялікага Папы Яна Паўла II у шостыя ўгодкі яго сьмерці. Велікапоснае чуваньне моладзі ў Менску было прысьвечана тэме свабоды. Дэвізам спатканьня сталі словы сьв. апостала Паўла да Галатаў: “Дзеля свабоды вызваліў нас Хрыстос”. 
На нядзельнай малітве “Анёл Гасподні” 3 красавіка 2011 году Бенядыкт XVI ушанаваў памяць свайго папярэдніка Слугі Божага Яна Паўла II, шостую гадавіну сьмерці якога Царква адзначала 2 красавіка, і разважаў пра духоўны шлях хрысьціянна. 
31 сакавіка 2011 году каталіцкая парафія візантыйска-славянскага абраду сьв. Мікіты ў Кастамлотах разьвіталася са сваім шматгадовым душпастырам, духоўным вучнем беларускіх айцоў марыянаў, адданым прыхільнікам еднасьці хрысьціянаў Усходу і захаду, айцом архімандрытам Раманам Пенткам, MIC, які спачыў у Любліне на 74 годзе жыцьця 26 сакавіка. Апошнія гады жыцьця ён моцна пакутаваў ад раку, а трохі больш за год таму яму ампутавалі правую нагу. 
З 29 па 31 сакавіка 2011 году ў Ерусаліме праходзіла 10-ая сустрэча двухбаковай камісіі дэлегацыяў Галоўнага Рабінату Ізраіля і Камісіі Апостальскай Сталіцы па справах рэлігійных сувязяў з габрэямі. Удзельнікі гэтай сустрэчы разам разважалі над выклікамі, з якімі сустракаецца сучаснае грамадзтва. 
Навіны за 2011 год
09.04.2011
8 красавіка 2011 году ў канферэнц-зале Менскага Епархіяльнага ўпраўленьня адбылося падпісаньне праграмы супрацоўніцтва Міністэрства адукацыі Рэспублікі Беларусь з Беларускай Праваслаўнай Царквой на 2011-2014 гады. Паводле яе плануецца праводзіць сумесную эксьпертызу навучальных праграм, падручнікаў і навучальных дапаможнікаў па прадметах сацыяльна-гуманітарнага цыклу і падрыхтоўку рэкамэндацыяў па іх удасканаленьні, паведамляе БЕЛТА.
Праграмай прадугледжваецца рэалізацыя інавацыйных і эксьперыментальных праектаў пля духоўна-маральнага выхаваньня навучэнцаў на праваслаўных традыцыях беларускага народу, а таксама прапануецца праваслаўнае краязнаўства як форма патрыятычнага выхаваньня.
Дакумэнт падпісалі міністар адукацыі Сяргей Маскевіч і Мітрапаліт Менскі і Слуцкі Філарэт. Паводле зьверхніка Беларускага Экзархату РПЦ, узаемадзеяньне сістэмы адукацыі і Праваслаўнай Царквы за мінулае дзесяцігоддзе стала больш шчыльным, пасьлядоўным і плённым. Ён адзначыў, што “сёньня, калі грамадзтва перажывае чарговы націск адкрыта псеўдадухоўных і псеўданавуковых ідэяў, разбурэньне ідэалу сям’і і традыцыйных асноваў беларускага народу, вельмі важна зьвярнуць увагу на нашых дзяцей, выхоўваючы сэрцы іх — паводле словаў сьв. Яна Залатавуснага — у дабрадзейнасьці”.
У чэрвені 2003 году было падпісана пагадненьне пра супрацоўніцтва паміж Рэспублікай Беларусь і БПЦ, у 2010 годзе завершана рэалізацыя першай праграмы супрацоўніцтва паміж Міністэрствам адукацыі і БПЦ.
Гл. таксама:
У грэка-католікаў Горадні пабывалі міністранты з Шчучына
«Статус-кво радыкальна зьменены». Эксьперт – пра выклікі і персьпектывы ўкраінскай Царквы
Папа Рымскі і Патрыярх Маскоўскі падпісалі сумесную дэкларацыю
Прадстаўнік Папскай Рады па спрыяньні еднасьці хрысьціянаў пра сустрэчу Папы Рымскага і Маскоўскага Патрыярха
Уніі практыкаваліся ў гісторыі практычна ўсіх Цэркваў
