12.03.2013

 

У чаканьні вынікаў першага дня галасаваньня 12 сакавіка 2013 году тысячы людзей, нягледзячы на дождж і холад, прыйшлі на плошчу сьв. Пятра. Аднак пасьля першай сэсіі галасаваньня кардыналы не змаглі абраць новага Папу, таму Канклаў у Ватыкане працягваецца — паведамляе Беларуская рэдакцыя Ватыканскага радыё.

 

Аб гэтым стала вядома а 19.41 гадз., калі з коміну над Сікстынскай капліцай узьняўся чорны дым. Кардыналы-выбаршчыкі правялі галасаваньне, але ніводзін з кандыдатаў ня змог набраць патрэбнай колькасьці галасоў (дзьве трэція плюс адзін голас).

 

Цяпер кардыналы адправіліся на адпачынак у Дом сьв. Марты, а выбары Папы Рымскага працягнуцца 13 сакавіка. Запланавана, што заўтра раніцай кардыналы зьбяруцца ў капліцы сьв. Паўла для ўдзелу ў супольнай сьв. Імшы. А 9.30 гадз. яны вернуцца ў Сікстынскую капліцу, памоляцца разам Літургіяй гадзінаў, а затым пачнуць чарговае галасаваньне. Калі ў выніку двух ранішніх тураў ня будзе абраны новы Папа, заўтра пройдзе яшчэ адна выбарчая сэсія паміж 17.00 і 19.00.

 

Калі ў чацьвер, пасьля 12 ці 13 тураў галасаваньня, ня будзе дасягнута выніку, кардыналы-выбаршчыкі возьмуць паўзу для малітвы і абмеркаваньняў, але ня больш чым на 24 гадзіны. У гэтым выпадку кардынал-протадыякан Жан-Луі Таран правядзе для ўсіх сабраных духоўнае разважаньне. Далей, калі будзе неабходна, пройдзе яшчэ 21 галасаваньне, з малітвамі і роздумам пасьля кожнага сёмага.

 

Калі Рымскі Архірэй ня будзе абраны на 9 дзень, адпаведна пасьля 33 або 34 безвыніковых галасаваньняў, будуць вызначаны два кандыдаты, якія набралі падчас папярэдніх тураў найбольшую колькасьць галасоў. Кардыналам будзе прапанавана прагаласаваць за аднаго з іх. Тады новым Папам стане той, хто набярэ простую большасьць галасоў.