01.04.2013

 

З нагоды сьвята Пасхі Хрыстовай Апостальскі Візітатар для грэка-католікаў Беларусі накіраваў вернікам БГКЦ сваё пастырскае Велікоднае пасланьне, у якім заклікае вернікаў у сьвятле Ўваскрослага Хрыста асэнсаваць пачатак служэньня новага Рымскага Архірэя Папы Францішка, ушанаваць мучаніцкі подзьвіг Экзарха а. Антона Неманцэвіча ў 70-ыя ўгодкія яго сьмерці, падзякаваць Госпаду за два дзесяцігоддзі магчымасьці адкрытай дзейнасьці БГКЦ на Бацькаўшчыне. А ў любові да роднай мовы і духоўнай культуры, сьведчаньні вернасьці Богу і Царкве Архімандрыт Сяргей (Гаек) нагадвае вернікам прыклад ахвярнага служэньня сьв. Кірылы і Мятода, Настаўнікаў славянскіх, і сьв. Язафата, Архібіскупа Полацкага.

 

Ніжэй прапануем тэкст Пастырскага слова Апостальскага Візітатара для грэка-католікаў Беларусі на сьвята Пасхі Хрыстовай 2013 году.

 

 

Пачэсныя Сьвятары і Дыяканы!

Любыя ў Госпадзе Манахі, Манахіні і Браты Семінарысты!

Дарагія Браты і Сёстры! Паважаныя Сябры!

 

Крыжу Твайму пакланяемся, Уладару наш,

і сьвятое Ўваскрасеньне Тваё славім.

 

1. Радасьць Уваскрасеньня Госпада і Збаўцы нашага Ісуса Хрыста вянчае шлях Вялікага посту. Сьпеў пакланеньня Ўваскросламу завяршае нашае маўчаньне і роздум над хрысьціянскім пакліканьнем.

 

У “Годзе веры” радасным сьпевам узьвялічваем пасхальную перамогу Ўваскрослага Хрыста ды ў сьвятле Ўваскрасеньня асэнсоўваем таямніцы нашай веры. З глыбіні сэрца кажам: “Веру, Госпадзе, і вызнаю”.

 

У духу глыбокай веры прымаем служэньне новага Біскупа Рыму, Папы Францішка, і дзякуем яму за заклік “несьці цеплыню надзеі” людзям. У пасхальны час разумеем, што крыніцай гэтай нязгаслай надзеі ёсьць праўда, якую радасна абвяшчаем: “Хрыстос уваскрос! — Сапраўды ўваскрос!”

 

2. У сьвятле Ўваскрасеньня Хрыстовага асэнсоўваем мучаніцкі шлях Экзарха нашай Беларускай Грэка-Каталіцкай Царквы — мучаніка Антона Неманцэвіча, закатаванага 70 гадоў таму ў нацысцкай турме ў Менску. Яго вернасьць Богу, Царкве і Беларусі — гэта заклік для ўсіх нас.

 

У сьвятле Пасхі Госпада і Збаўцы нашага Ісуса хочам асэнсаваць наш супольны 20-гадовы подзьвіг адкрытай дзейнасьці грэка-каталіцкіх парафіяў у Беларусі ў структурах Апостальскай Візітатуры — душпастырскай платформы акармленьня вернікаў нашай Царквы.

 

У тым жа пасхальным сьвятле Ўваскрасеньня Хрыстовага асэнсоўваем сьведчаньне вернасьці Богу і Царкве сьвятамучаніка Язафата, Архібіскупа Полацкага — мучаніка за Праўду Евангельля.

 

3. Евангельле Ісуса Хрыста – гэта крыніца нашай веры. Хочам глыбока прыняць яго ў нашыя сэрцы і мужна несьці іншым. Таму з асаблівай пашанай глядзім на роўнаапостальных Кірылу і Мятода, Настаўнікаў славянскіх.

 

1150 гадоў таму прынесьлі яны славянам Евангельле на роднай мове. Тое ж самае Евангельле Ісуса Хрыста хочам сёньня на роднай мове абвяшчаць усім нашым братам і сёстрам — жыхарам Беларусі. І хочам сьведчыць, што гэтае ж Евангельле нясе ўсім людзям добрай волі нястомную надзею.

 

На пачатку Вялікага посту, 14 лютага, мы ўзгадвалі спачын сьвятога Кірылы Салунскага, манаха; на Сьветлым тыдні — 6 красавіка — ўзгадваем спачын сьвятога архібіскупа Мятода Салунскага.

 

Малітвы сьвятых Братоў Салунскіх хай умацоўваюць нас у любові да нашай роднай мовы і духоўнай культуры.

 

4. Пачэсныя Айцы! Любыя ў Госпадзе Браты і Сёстры! Паважаныя Сябры!

 

Няхай сьвяты Пасхі Гасподняй будуць для ўсіх нас жывой сустрэчай з Уваскрослым Ісусам Хрыстом, Які ўмацоўвае нашую надзею і прасьвятляе нашае жыцьцё сьвятлом сваёй Пасхальнай Перамогі.

 

Няхай праз заступніцтва Багародзіцы ды праз прыклад і малітвы мучанікаў і

стведкаў Хрыста на нашай Беларускай зямлі блаславеньне Ўваскрослага Хрыста дойдзе да ўсіх вас, да ўсіх вернікаў нашай Царквы ў Беларусі і ў замежжы, да ўсіх хрысьціянаў і да людзей добрай волі ў нашай Бацькаўшчыне.

 

Усіх вас шчыра віншую з сьветлым Хрыстовым Уваскрасеньнем:

 

Хрыстос уваскрос! — Сапраўды ўваскрос!

 

Менск, Пасха Хрыстова 2013 г.

 

+ Архімандрыт СЯРГЕЙ (Гаек)

Апостальскі Візітатар для грэка-католікаў Беларусі