21.05.2013

 

«Сустрэча Папы Францішка з Папам Тавадрасам ІІ выклікала радасьць асабліва сярод самых звычайных людзей. Сёньня ёсьць надзея на канкрэтныя крокі на шляху да еднасьці», — адзначыў каталіцкі Патрыярх Александрыі Ібрагім Ісаак Сідрак, каментуючы візіт зьверхніка Копцкай Праваслаўнай Царквы Папы і Патрыярха Александрыйскага ды ўсёй Афрыкі Тавадраса ІІ у Ватыкан.

 

Першаярарх Копцкай Каталіцкай Царквы зьвярнуў ўвагу, што Папа Францішак падчас размовы з праваслаўным Патрыярхам Тавадрасам ІІ (Тодарам ІІ) казаў пра сулучнасьць у сьв. Хросьце, асаблівай праявай якой «зьяўляецца наша сумесная малітва». Зьверхнік копцкіх католікаў Патрыярх Ібрагім Ісаак Сідрак падкрэсьліў асаблівую важнасьць гэтых словаў у кантэксьце распаўсюджанай дагэтуль сярод праваслаўных коптаў практыкі паўторнага хросту людзей, якія прыходзяць з Каталіцкай Царквы. Гэтая практыка спараджае шмат непаразуменьняў і зьяўляецца перашкодаю для сумеснага хрысьціянскага сьведчаньня. Ёсьць спадзяваньне, што Патрыярх Тавардас II вынясе гэтае пытаньне ў парадак дня будучага Сіноду.

 

Патрыярх коптаў-католікаў адзначыў, што ўжо сам факт сустрэчы праваслаўнага і каталіцкага першаярархаў у Доме сьв. Марты дазволілў Папе Францішку і Тавардасу II бліжэй пазнаць адзін аднаго ня толькі падчас афіцыйнай сустрэчы, але і стварыў дадатковыя магчымасьці для дыскусіі і малітвы. Такая сямейная абстаноўка дазваляе выявіць многія рэчы.

 

Таксама Патрыярх Ібрагім Ісаак Сідрак высока ацаніў той факт, што афіцыйныя прамовы Рымскага Архірэя і Тавадраса ІІ не датычыліся непасрэдна палітычных і грамадзкіх праблемаў Ягіпту — гэта была «сустрэча эклезіяльнага характару». «Мы, хрысьціяне, павінны аб’яднацца, каб служыць іншым. Нашая еднасьць ня можа быць зьведзена да палітычнага саюзу супраць агульнага ворага», — дадаў копцкі першаярарх, чые словы цытуе інфармацыйная служба Agenzia Fides.

Нагадаем, Патрыярх Копцкай Праваслаўнай Царквы Тавадрас II сустрэўся з Сьвятым Айцом Францішкам у Рыме 10 траўня 2013 году.