20.07.2013

 

10-14 ліпеня 2013 году адбылася XIX штогадовая грэка-каталіцкая пілігрымка Віцебск — Полацак у гонар Полацкіх мучанікаў, у якой сёлета прынялі ўдзел больш за 125 вернікаў з розных куткоў Беларусі.

 

“Веру, Госпадзе, і вызнаю…” — такі быў дэвіз сёлетняй пілігрымкі, якая адбывалася ў Год веры.

 

Шлях сьвятамучаніка Язафата — ад месца ягонага мучаніцтва ў Віцебску да ягонай Полацкай катэдры ў храме сьв. Сафіі, якая стала таксама месцам мучаніцкай сьмерці Полацкіх мучанікаў манахаў-базыльянаў — пілігрымы прайшлі за 4 дні: з серады да суботы.

 

Каля 70 пілігрымаў прайшлі гэтым шляхам для ўшанаваньня памяці і ў намеры праслаўленьня пяці Полацкіх мучанікаў — манахаў-базыльянаў: а. Канстанціна Заянчкоўскага, а. Тэафана Калбячынскага, а. Якуба Кізякоўскага, а. Якуба Кнышэвіча і бр. Язэпа Анкудовіча, забітых расейскім царом Пятром І у сьценах Сафійскага сабору ў Полацку 11 ліпеня 1705 году.

 

У апошні дзень пілігрымкі на ўрачыстай Боскай Літургіі ў Полацку да пілігрымаў далучылася яшчэ і вялікая група вернікаў з Менску Баранавічаў і іншых мясцовасьцяў, і агульная колькасьць удзельнікаў перавысіла 125 чалавек.

 

Пілігрымка пачалася ў сераду раніцай, 10 ліпеня, Малебнам у грэка-каталіцкім храме ў Віцебску. У гэты дзень пілігрымы прайшлі шлях да Шуміліна, дзе ў рыма-каталіцкім храме Маці Божай Фацімскай была адслужана Боская Літургія як падзяка Богу за дар веры Беларускага народу. Варта адзначыць, што традыцыйна пілігрымка грэка-католікаў адбываецца ў духу міжканфесійнага дыялогу, тым больш што сярод пілігрымаў ёсьць рыма-католікі і нават праваслаўныя. Удзельнікі пілігрымкі заўсёды моляцца за жыхароў усіх мясьцінаў, якія сустракаюцца на шляху пілігрымкі.

 

У наступныя дні пілігрымы прайшлі праз Вобаль (чацьвер), Гараны (пятніца), Струньне да Полацка (субота). На ўсім шляху пілігрымкі яе ўдзельнікі разважалі пра подзьвіг веры вялікіх сьведкаў Хрыста — сьвятых настаўнікаў славянаў роўнаапостальных Кірылы і Мятода, першага хрысьціянскага місіянера Полаччыны ісландзкага манаха Торвальда Вандроўніка, сьвятых Уладзіміра і Вольгі, сьвятамучаніка Язафата, 5-ці Полацкіх мучанікаў ды іншых сьвятых Беларускага народу.

 

На завяршэньне пілігрымкі, у нядзелю, 14 ліпеня, у Полацку, ля храму сьв. Параскевы Полацкай, была адслужана сьвяточная Боская Літургія, якую ўзначаліў Апостальскі Візітатар Беларускай Грэка-Каталіцкай Царквы Архімандрыт Сяргей (Гаек). Падчас урачыстага набажэнства грэка-католікі ўзгадалі 1150-ыя ўгодкі славянскай Місіі сьвятых Кірылы і Мятода і 1025-годдзе Хросту Русі.

 

Праграма XIX грэка-каталіцкай пілігрымкі прадбачала таксама разважаньні над гісторыяй Грэка-Каталіцкай Царквы ў Беларусі — як даўняй, так і больш блізкай, калі пачалося новае адраджэньне Зьяднанай Царквы ў незалежнай Беларусі.

 

Адной з вялікіх постацяў, з духоўнай спадчынай якой бліжэй пазнаёміліся вернікі дзякуючы казаньням а. Яўгена Ўсошына, дэкана БГКЦ, была постаць уладыкі Іпація Пацея, які спачыў 400 гадоў таму - 18 ліпеня (8 ліпеня старога стылю) 1613 году. Ён быў сярод тых, хто ініцыяваў і падпісаў царкоўную Унію ў Рыме ў 1595 годзе, а пазьней быў уніяцкім мітрапалітам Кіеўскім, адданым абаронцам Еднасьці, які нямала пацярпеў за гэта. Іпаці Пацей пакінуў пасьля сябе шматлікія творы, прасякнутыя шчырым клопатам і жаданьнем абараніць еднасьць Царквы Хрыстовай, каб быў выкананы запавет Хрыста “каб усе былі адно”.

 

Напрыканцы пілігрымкі, у нядзелю, 14 ліпеня, пасьля сьвяточнай Боскай Літургіі была адслужана Паніхіда за супакой спачылага выдатнага першаярарха Ўніяцкай Царквы мітрапаліта Іпація Пацея.

 

Грэка-каталіцкая пешая пілігрымка з Віцебску ў Полацак за 19 гадоў стала добрай школай любові да Бога, Царквы і Бацькаўшчыны.