19.02.2014

 

 

“Я запэўніваю ў маёй блізкасьці да ўкраінскага народу і малюся за ахвяры насільля, за членаў іх сем’яў і за параненых. Заклікаю ўсе бакі спыніць любыя акты насільля і шукаць згоды і міру ў краіне”, — сказаў Рымскі Архірэй.

 

Рэакцыя Папы Францішка пасьледавала пасьля атрыманьня інфармацыі аб шматлікіх ахвярах начнога супрацьстаяньня ў Кіеве, у тым ліку з сьмяртэльным зыходам. Гэта ўжо ня першы за апошнія час заклік Сьвятога Айца да мірнага вырашэньня палітычнага крызісу і канфлікту ва Ўкраіне.

 

Еўрапейскія палітыкі называюць сітуацыю ва Ўкраіне ўжо некантралюемай, а падзеі ў ноч на 19 лютага 2014 году ва Ўкраіне — “чорным днём Еўропы”.

 

Паводле зьвестак на вечар 19 лютага 2014 году ў сутыкненьнях паміж пратэстоўцамі і супрацоўнікамі МУС у Кіеве загінулі 26 чалавек (10 міліцыянтаў і 16 грамадзянскіх асобаў). Згодна з інфармацыяй Дэпартаменту аховы здароўя за медычнай дапамогай зьвярнуліся больш за 600 удзельнікаў акцыяў пратэсту. Зараз на стацыянарным лячэньні ва ўстановах аховы здароўя з рознымі траўмамі і пашкоджаньнямі, вогнестрэльнымі ранамі і апёкамі знаходзяцца 277 удзельнікаў масавых мерапрыемстваў. Міністар аховы здароўя Ўкраіны Раіса Багатырова паведаміла таксама пра 371 супрацоўніка міліцыі і ўнутраных войск, якія атрымалі траўмы рознай цяжкасьці. Параненыя ёсьць ужо таксама і ў іншых рэгіёнах Украіны, дзе адбываюцца захопы будынкаў мясцовых дзяржадміністрацыяў.

 

20 лютага абвешчаны днём жалобы ва Ўкраіне ў сувязі з шматлікімі чалавечымі ахвярамі ў выніку палітычнага супрацьстаяньня ў краіне. У дзень жалобы ў храмах розных канфесіяў адбудуцца памінальныя набажэнствы.