23.12.2014

 

 

У лісьце, апублікаваным 23 сьнежня 2014 году, Сьвяты Айцец выказаў занепакоенасьць лёсам вучняў Хрыста, якія жывуць на Сьвятой Зямлі з апостальскіх часоў, і запэўніў у салідарнасьці з імі ўсёй Царквы.

 

Папа спадзяецца, што зможа і асабіста наведаць ды суцешыць мясцовых хрысьціянаў. Рымскі Архірэй рашуча асудзіў тэрарыстычную дзейнасьць «Ісламскай дзяржавы» і іх жахлівыя злачынствы. Кажучы пра пакуты ахвяраў, ён адзначыў, што «зьвяртаецца да Бога і заклікае ўсіх далучыцца да дапамогі, да малітвы і да ўсіх відаў ініцыятыў». Сьвяты Айцец падкрэсьліў, што ў часы выпрабаваньняў трэба быць моцна зьяднанымі з Хрыстом, і заахвоціў, каб гэты цяжкі досьвед умацаваў веру і вернасьць, адрадзіў братэрства і еднасьць, вёў да сьвятасьці.

 

Францішак адзначыў, што складаныя выклікі зьяўляюцца шанцам для ўмацаваньня адносінаў паміж католікамі розных абрадаў і хрысьціянамі розных канфесіяў. «Гэта экуменізм крыві, які патрабуе даверу да Сьвятога Духа», — напісаў ён. Біскуп Рыму падкрэсьліў важнасьць хрысьціянскай прысутнасьці на Блізкім Усходзе і ўказаў на важнасьць міжрэлігійнага дыялогу, які ўсё больш неабходны ў сучаснай складанай сітуацыі.

 

Рымскі Архірэй падкрэсьліў, што хрысьціяне могуць таксама дапамагчы мусульманам, паказаўшы, што, як яны самі кажуць, іслам зьяўляецца рэлігіяй міру і можа знаходзіцца ў гармоніі з пашанай да правоў чалавека і спрыяць суіснаваньню ўсіх. Адначасова Папа адзначыў, што «драматычная сітуацыя жыцьця нашых братоў-хрысьціянаў у Іраку, але таксама езідаў і прадстаўнікоў іншых рэлігійных ды этнічных супольнасьцяў, патрабуе ад усіх рэлігійных лідараў заняць выразную і сьмелуюй пазіцыю, каб аднадушна і без усялякай двухсэнсоўнасьці асудзіць такія злачынствы і практыку выкарыстаньня рэлігіі для іх апраўданьня».

 

Сьвяты Айцец нагадаў, што хрысьціянскім пакліканьнем зьяўляецца актыўны ўдзел у жыцьці сваіх краінаў, умацаваньне міру, яднаньне і разьвіцьцё ў супрацоўніцтве з нацыянальнымі і міжнароднымі органамі. Ён падкрэсьліў важнасьць прысутнасьці сьвятароў сярод вернікаў у цяжкія моманты гісторыі. У пасланьні Папа таксама заклікаў моладзь «не баяцца і не саромецца быць хрысьціянамі”, а пажылых людзей — перадаваць веру і традыцыі новым пакаленьням; працуючым у дабрачынных і адукацыйных праектах — выхоўваць у людзях культуру сустрэчы, павагі да годнасьці чалавека і абсалютнай каштоўнасьці кожнай чалавечай істоты. Сьвяты Айцец Францішак запэўніў блізкаўсходніх католікаў у салідарнасьці і падтрымцы іх у гэты складаны час усёй Царквы.

 

Папа таксама заклікаў міжнародную супольнасьць узмоцніць падтрымку для ўсяго Блізкага Ўсходу — як праз мірныя ініцыятывы і малітву, так і праз гуманітарную дапамогу. Сьвяты Айцец выказаў падзяку хрысьціянам на Блізкім Усходзе за іх сьведчаньне веры і малітву. «Я вельмі спадзяюся, што мне будзе дадзена ласка прыбыць да вас асабіста, каб вас наведаць і падтрымаць», — напісаў Папа. Ён даверыў мясцовых вернікаў апецы Маці Божай і ўдзяліў сваё апостальскае блаславеньне, жадаючы перажыць сьвяты Нараджэньня Хрыстова ў любові і супакоі Хрыста Збаўцы.