27.01.2015

 

 

Малітвы падчас гэтага экуменічнага набажэнства прачыталі праваслаўны мітрапаліт Генадзіяс (Лімурыс), прадстаўнік Канстанцінопальскага Патрыярхату, і архібіскуп Дэвід Моксан з Англіканскай Царквы,

асабісты прадстаўнік у Рыме Архібіскупа Кентэрберыйскага. Таксама прадстаўнікі розных Цэркваў і супольнасьцяў чыталі фрагменты Сьвятога Пісаньня. У вячэрняй экуменічнай малітве разам з вернікамі розных канфесіяў, якія жывуць на тэрыторыі япархіі Рыму, бралі таксама ўдзел удзельнікі экуменічнага кангрэсу манахаў і манахіняў з розных Цэркваў, які праходзіў у Рыме.

 

У сваёй прамове, зьвяртаючыся да прысутных, Сьвяты Айцец падкрэсьліў, што «многія рознагалосьсі паміж хрысьціянамі, успадкаваныя з мінулага, можна пераадолець, адкладаючы ў бок палеміку ці апалагетыку і спрабуючы разам зразумець, што ў сутнасьці нас аб’ядноўвае, гэта значыць заклікае да ўдзелу ў таямніцы любові Айца, якая аб’яўлена нам праз Сына за пасярэдніцтвам Сьвятога Духа». Францішак спаслаўся на хрост, у якім «праз Сьвятога Духа мы сталі адным з Хрыстом, сынамі ў Сыне, сапраўднымі прыхільнікамі Айца». Менавіта таямніца любові зьяўляецца самым глыбокім матывам еднасьці — лічыць Папа, бо яна аб’ядноўвае ўсіх хрысьціянаў і зьяўляецца нашмат большай за ўсе падзелы,

якія мелі месца на працягу гісторыі. Ён адзначыў, што наколькі пакорліва мы набліжаемся да Бога, настолькі мы набліжаемся адзін да аднаго.

 

«Еднасьць хрысьціянаў ня стане вынікам мудрагелістых тэарэтычных дыскусіяў, у якіх кожны будзе імкнуцца пераканаць іншага ў правільнасьці ўласных поглядаў, — адзначыў Рымскі Архірэй. — Наступіць другое прышэсьце Сына Чалавечага і засьпее нас яшчэ ў спрэчках! Мы павінны прызнаць, што для дасягненьня глыбіняў тайны Бога мы маем патрэбу адзін у адным, мы павінны сустракацца і абменьвацца думкамі пад кіраваньнем Сьвятога Духа, Які прыводзіць да гармоніі разнастайнасьць і пераадольвае канфлікты».

 

Папа Францішак нагадаў, што Ісус, праходзячы з Юдэі ў Галілею, не сумняваўся ў тым, каб папытаць вады ў Самаранкі. Гэта была ня толькі фізічная смага, але і прагненьне сустрэчы, каб даць ёй магчымасьць устаць на шлях духоўнага навяртаньня. Ён зьвярнуў таксама ўвагу, што сустрэча з Ісусам перамяніла Самаранку ў місіянерку і вярнула ёй сэнс і радасьць жыцьця. І менавіта таму яна прагнула падзяліцца гэтай радасьцю з іншымі.

Сьвяты Айцец адзначыў, што ў нашыя дні «ёсьць мноства стомленых і змучаных смагай людзей, якія просяць нас, хрысьціянаў, даць ім піць». Гэта просьба, ад якой «ніхто ня можа схавацца»: «У пакліканьні да евангелізацыі ўсе Цэрквы і царкоўныя супольнасьці знойдуць значную прастору для больш цеснага супрацоўніцтва. Для таго, каб пасьпяхова выконваць гэтую задачу, неабходна пазьбягаць замкнёнасьці ў сваіх асаблівасьцях і выключнасьці, роўна як і навязваньня аднастайнасьці ў імя выключна чалавечых планаў».

 

Агульны абавязак абвяшчаць Евангельле дазваляе пераадолець усе формы празелітызму і спакусы канкурэнцыі. «Усе мы служым аднаму і таму ж Евангельлю!» — падкрэсьліў Францішак. Папа нагадаў таксама, што праз сваё сьведчаньне пра Ісуса Хрыста многія хрысьціяне сёньня церпяць і, будучы перасьледаваныя, нярэдка аддаюць і ўласнае жыцьцё. Пры гэтым тыя, што чыняць перасьлед, не выбіраюць паміж веравызнаньнямі. Іх перасьледуюць за тое, што яны — хрысьціяне. І гэта ёсьць экуменізм крыві, адзначыў Сьвяты Айцец.

 

Менавіта таму «пошук хрысьціянскай еднасьці ня можа быць прэрагатывай пэўных асобаў ці рэлігійных супольнасьцяў, асабліва адчувальных да гэтага пытаньня» — лічыць Рымскі Архірэй. На яго думку,

узаемнае спазнаньне розных традыцыяў і плённы абмен досьведам можа быць карысным для розных Цэркваў і царкоўных супольнасьцяў.

 

Старшыня Папскай Рады па спрыяньні еднасьці хрысьціянаў кардынал Курт Кох у сваёй прамове ў адказ адзначыў, што «вада хрышчэньня пачынае струменіць з нас крыніцаю, што цячэ да нашых братоў, каб спатоліць іх смагу». На яго думку «гэты досьвед патрабуе ад усіх хрысьціянаў супольнага сьведчаньня ў сучасным сьвеце, які адзначаецца эгаізмам і сквапнасьцю, канфліктамі і нянавісьцю, гвалтам і агрэсіяй».

 

Паводле матэрыялаў расейскай, беларускай і польскай службаў Радыё Ватыкану.