01.07.2010

Як паведамляе Радыё Свабода, Міністэрства культуры накіравала ў Наваградзкі райвыканкам жорсткае патрабаваньне прыпыніць усе працы па рэканструкцыі старажытнай Барысаглебскай царквы, на якой праваслаўны прыход вырашыў паставіць залатыя цыбуліны.

Гэтую інфармацыю пацьвердзіў "Нашай Ніве" Начальнік упраўленьня па ахове гісторыка-культурнай спадчыны і рэстаўрацыі Міністэрства культуры Ігар Чарняўскі, які паведаміў, што ягонае ведамства падрыхтавала прадпісаньне па вядзеньні рэстаўрацыйных працаў у Наваградку. Копія прадпісаньня накіравана ў Наваградзкі райвыканкам.

Прадстаўнік Міністэрства культуры аднак не ўдакладніў дэталі гэтага прадпісаньня, адзначыўшы, што цяпер вядзецца падрыхтоўка неабходнай нарматыўнай дакументацыі. "А ці будуць тыя цыбуліны, ці не будуць, стане ясна пасля канчатковай падрыхтоўкі праекту", — заўважыў ён журналісту "Нашай Нівы".
На думку чыноўніка вакол Барысаглебскай царквы ў Наваградку занадта шмат эмоцыяў. Ёсьць нацыянальнае заканадаўства, ёсьць еўрапейскае, вось і трэба трымацца законаў, а не эмоцыяў, кажа ён.

Нагадаем, у абарону гэтага арыгінальнага помніка сакральнай архітэктуры пачатку 16 стагоддзя сусьветнага значэньня, які спалучае ў сабе элементы готыкі і рэнесансу, выступіў старшыня Беларускага добраахвотнага таварыства аховы помнікаў гісторыі і культуры Антон Астаповіч. Даволі рэзкі адкрыты ліст у СМІ, Беларускі экзархат Расейскай Праваслаўнай Царквы і Міністэрства культуры накіравала таксама група прадстаўнікоў беларускай інтэлігенцыі.

Гісторыка-культурнае значэньне Барысаглебскай царквы ў Наваградку яшчэ і ў тым, што яе будаўніцтва, як храму абарончага тыпу, фундаваў князь Канстанцін Астрожскі, таксама яна служыла пэўны час рэзідэнцыяй уніяцкаму Кіеўскаму мітрапаліту Язэпу Вельяміну Руцкаму, які заснаваў тут уніяцкі манаскі Закон сьв. Васіля Вялікага (Ордэн базыльянаў).