22.04.2016

 

 

Менавіта на літургічных перакладах айца Надсана адбывалася станаўленьне грэка-каталіцкай супольнасьці 25 гадоў таму, менавіта ён захаваў такую спадчыну, якую цяперашняму пакаленьню яшчэ трэба будзе асэнсаваць, адзначыў у інтэрв’ю Беларускай рэдакцыі Ватыканскага радыё Апольстальскі Візітатар для грэка-католікаў Беларусі архімандрыт Сяргей Гаек.

 

«Можна сказаць, што евангелізацыю на роднай беларускай мове ў свой час пачаў Францішак Скарына, а вельмі значны ўклад у гэтую справу ўнёс айцец Аляксандар Надсан. І ня толькі для грэка-католікаў, але і для ўсіх хрысьціянаў Беларусі. Трэба сказаць, што ён пакінуў спадчыну і мы павінны вырашыць, што з ёй рабіць. Гэта выклік для нас. Ёсьць пэўныя працы, якія ён пачаў пісаць і ня скончыў, на жаль. Напрыклад, чарнавік яго кнігі пра архімандрыта Льва Гарошку», — сказаў сьвятар.

 

У Грэка-Каталіцкай Царкве Беларусі спадзяюцца, што справа Надсана будзе працягнута. Аўтарытэт для сьвятароў і вернікаў — ён нібыта зьвязваў пакаленьні і запальваў тых, хто імкнуўся да веры, нагадаў Архімандрыт Сяргей. «Гэта ёсьць заданьне на будучыню. І, вядома, мы адчуваем недахоп пэўнага аўтарытэта, які б накіроўваў нашыя ініцыятывы літургічных перакладаў і іншую працу. У замежжа засталіся блізкія супрацоўнікі айца Аляксандра, якія працягваюць там яго працу. Але трэба яшчэ шмат папрацаваць у Беларусі, бо мы, грэка-католікі, ужо перайшлі праз гэты мост і ёсьць тут. Калі мы прыйшлі на абяцаную зямлю, трэба не спыняцца, трэба штосьці рабіць, ісьці далей», — лічыць айцец Сяргей Гаек.

 

Айца Аляксандра Надсана ўспамінаюць ня толькі як таленавітага дасьледчыка, дасканалага перакладчыка, але асабліва — як сапраўднага пастыра. І асобу, якая яднала ўсіх грэка-католікаў замежжа. Чаго сёньня, мабыць, не хапае, прызнаўся архімандрыт Сяргей Гаек.

 

Яшчэ перад адыходам да вечнасьці айца Аляксандра Надсана, Апостальскага візітатара для беларусаў-католікаў у замежжы, адбыліся пэўныя зьмены: беларускія грэка-каталіцкія структуры замежжа ўліліся ў жыцьцё мясцовых Цэркваў. «Структурна гэта нават спрасьціла працу душпастыраў замежжа. Але, вядома, там не хапае духоўнага лідара, які сваім аўтарытэтам яднаў бы гэтыя адзінкі. Гэта новая сітуацыя. Душпастырскай працай і жыцьцём беларускіх грэка-католікаў у замежжв цяпер больш цікавіцца Кангрэгацыя Ўсходніх Цэркваў. Але ў плане духоўным ёсьць плюсы і мінусы. У сэнсе структурнай дынамізацыі парафіяў нічога дрэннага ня сталася, як раз можа нават і наадварот. З іншага боку, недахоп духоўнага лідара, можна сказаць, бацькі, мы адчуваем. І таму для нас гэта выклік. Трэба нам усё гэта асэнсаваць і імкнуцца выкарыстаць той скарб, які дадзены», — лічыць архімандрыт Сяргей Гаек.

 

Айцец Аляксандар Надсан памёр 15 красавіка 2015 году ў Лондане, пакінуўшы пасьля сябе вялікую духоўную і літаратурную спадчыну. А яшчэ пытаньні, роздумы і, галоўнае, прыклад — адданага жыцьця і цярплівай працы дзеля адраджэньня веры і Бацькаўшчыны.