04.06.2016

 

 

Акрамя супрацоўнікаў гэтай ватыканскай кангрэгацыі ў пілігрымцы прынялі ўдзел рэктары і студэнты Папскіх калегіяў, што існуюць у Рыме: Грэцкай калегіі, Украінскай калегіі сьв. Язафата, Румынскай калегіі, Калегіі «Русікум», Мараніцкай калегіі, Армянскай калегіі, Эфіёпскай калегіі, калегіі сьв. Яна Дамаскага, Калегіі сьв. Ахрэма, і богапасьвячаныя асобы ўсходніх манаскіх законаў і згуртаваньняў.

 

Падчас працэсійнай хады, якая распачалася каля замку Сьвятога Анёла, удзельнікі пілігрымкі вуліцамі Рыму маліліся Ружанец і па чарзе чыталі псальмы, а хоры розных абрадаў сьпявалі духоўныя песьні і гімны на шляху да базылікі сьв. Пятра. Пасьля чытаньня юбілейнай малітвы ўсе ўдзельнікі пілігрымкі прайшлі праз Сьвятыя Дзьверы Міласэрнасьці пад няспынны сьпеў «Госпадзе, Ісусе Хрысьце, Сыне Божы, зьмілуйся нада мною, грэшным!». Затым пілігрымы з Ўсходніх Цэркваў падыйшлі да галоўнага алтара базылікі, што над магілай сьвятога апостала Пятра. Тут быў прачытаны ўрывак з Евангельля, які зьмяшчае вызнаньне веры Пятра, абяцаньне Госпада збудаваць на ім Царкву Сваю і даць яму ўладу.

 

Кардынал Леанарда Сандры, Прэфект Кангрэгацыі Ўсходніх Цэркваў, які разам з архібіскупам Цырылам Васілем, Сакратаром Усходняй Кангрэгацыі, узначальваў пілігрымку, прамовіў малітву і, зьвяртаючыся да ўдзельнікаў, у кароткім разважаньні падкрэсьліў значэньне гэтага сумеснага паломніцтва, якім яго ўдзельнікі засьведчылі прысутнасьць Усходніх Каталіцкіх Цэркваў у Рыме.

Кардынал Сандры ўзгадаў таксама пра ўсходніх хрысьціянаў, што жывуць сёньня ў зонах ваенных дзеяньняў, і якія штодзень сутыкаюцца з пагрозаю сьмерці ад ворагаў хрысьціянства. Ён падзякаваў усходнім католікам за сумесную малітву, якую ў асаблівы спосаб яны ахвяравалі за вырашэньне канфліктных сітуацыяў у Іраку, Сірыі, Украіне. «Просім міру для нашых братоў і сясьцёр! ...Гэтая пілігрымка завяршылася, але гэта толькі пачатак — гэта зыходная кропка, каб ісьці ў сьвет і сьведчыць Божую міласэрнасьць», — адзначыў Кардынал Сандры. «Будзьце міласэрныя, як і Айцец ваш міласэрны» (Лк 6, 36) заклікаў напрыканцы ватыканскі ярарх і ўдзяліў пілігрымам архірэйскае блаславеньне.

 

Пасьля заканчэньня пілігрымкі, сьвятары і семінарысты Ўкраінскай Папскай калегіі сьвятога Язафата, студэнты з Калегіі «Русікум», айцы-базыльяне, сёстры-базыльянкі і сёстры-служэбніцы разам з Найдастойным Уладыкам Кірылам (Васілем), Сакратаром Усходняй Кангрэгацыі, супольна памаліліся на магіле сьвятамучаніка Язафата, якая знаходзіцца ў базыліцы сьвятога апостала Пятра.

 

Паводле матэрыялаў сайту Румынскай калегіі Pioromeno.com і Ўкраінскай рэдакцыі Радыё Ватыкану.