19.06.2020

 

 

Ужо шмат гадоў грэка-католікі Горадні летам выпраўляюцца ў невялікую пілігрымку з Горадні ў Навумавічы, каб у такі спосаб ушанаваць блаславёную Мар’яну Бярнацкую, а таксама мясцовых сьвятых і мучанікаў за веру.

 

Сёлета ў Нядзелю Ўсіх сьвятых беларускага народу група гарадзенскіх грэка-католікаў разам з сваім парахам а. Андрэем Кратом, дэканам Заходняга дэканату Беларускай Грэка-Каталіцкай Царквы, таксама зьдзейсьнілі такую пілігрымку да месца мучаніцкай сьмерці блаславёнай Мар’яны Бярнацкай, што знаходзіцца каля вёскі Навумавічы ў форце № 2.

 

Для гарадзенскіх каталікоў вёска Навумавічы, што за 10 кіламетраў ад гораду — гэта асаблівае месца. Там, каля старых фартоў часоў I Сусьветнай вайны ў часы ІІ Сусьветнай вайны нацысты праводзілі расстрэлы мірных жыхароў Горадні і ваколіцаў, сярод іх былі каталіцкія сьвятары, манахі і манахіні, простыя вернікі. Усяго падчас расстрэлаў 20 кастрычніка 1942 году, а таксама 13 і 15 ліпеня 1943 году каля Навумавічаў былі забітыя каля дзьвюх соцень чалавек. На сёньняшні дзень удалося выявіць 150 імёнаў расстраляных людзей.

 

Па дарозе ў Навумавічы грэка-католікі наведалі касьцёл у Адамавічах, дзе памаліліся каля цудатворнага абраза Маці Божай. Гэта месца знакавае для гарадзенскіх грэка-католікаў, бо маліцца да гэтага абраза Багародзіцы у свой час прыходзілі многія ўніяты пасьля забароны Уніі, у часы перасьледу ўпартых уніятаў, якія не жадалі пераходзіць у праваслаўную Царкву.

 

У кароткім  каментары для Радыё Рацыя айцец Андрэй Крот, дэкан Заходняга дэканату Беларускай Грэка-Каталіцкай Царквы, расказаў пра бласл. Мар’яну Бярнацкую і пілігрымку ў яе памяць: «Яна паходзіла з уніяцкай сям’і. Сама яна была рыма-каталічкай, бо нарадзілася ўжо пасьля скасаваньня Уніі, але ўсяго толькі праз некалькі гадоў. І таму гэтая сьвятая для нас асабліва блізкая. Для нас важна наведаць месца памяці блаславёнай Мар’яны Бярнацкай, там памаліцца. Таксама мы молімся ў Адамавічах, каля цудатворнага Адамавіцкага абраза Маці Божай у касьцёле, дзе ў свой час маліліся таксама нашыя продкі-ўніяты ў часы перасьледу. Такая нашая даніна памяці нашым сьвятым продкам».

 

Падчас нямецкай акупацыі бласл. Мар’яна Бярнацкая аддала сваё жыцьцё, каб уратаваць сваю цяжарную нявестку, якую нацысты арыштавалі ў якасьці адной з закладнікаў. Нацысты расстралялі Мар’яну Бярнацкую разам з іншымі закладнікамі на навумавіцкіх фартах пад Горадняй. Але яна ўратавала цяжарную нявестку і дала магчымасьць нарадзіцца свайму ўнуку. За гэты подзьвіг Сьвяты Айцец Ян Павел ІІ у чэрвені 1999 году далучыў яе да ліку блаславёных сярод 108 новамучанікаў з часоў ІІ Сусьветнай вайны.

Фота: Грэка-каталіцкая парафія, Горадня.