01.12.2020

 

 

 

 

30 лістапада 2020 году грэка-каталіцкі сьвятар а. Віталь Быстроў быў прысуджаны ў Івацэвічах да арышту на 10 содняў паводле арт. 23.34 КоАП.

 

Сьвятар Віталь Быстроў жыве ў Івацэвічах, працуе на сьвецкай працы і нясе сацыяльнае служэньне на тэрыторыі ўсёй Берасьцейскай вобласьці. Ён не прыпісаны да кліру Івацэвіцкай грэка-каталіцкай парафіі.

 

Адказваючы на абвінавачаньне ва ўдзеле ў несанкцыянаваным мерапрыемстве, а. Віталь не прызнаў сябе вінаватым. Ён паясьніў, што падчас самотнага шпацыру па вул. Савецкай меў некалькі размоваў з мінакамі. Падчас знаходжаньня ў натоўпе ён таксама меў гутарку з прадстаўнікамі МУС, падчас якое прадставіўся і паясьніў адкуль ён. Нейкай іншай актыўнасьці, якую можна было кваліфікаваць як удзел у масавай акцыі, а. Віталь, паводле ягонага сьведчаньня, не праяўляў.

 

Не ўдаючыся ў глыбокія юрыдычныя спрэчкі, мусім адзначыць, што суб’ектыўнага складу правапарушэньня ў дзеях а. Віталя Быстрова ня бачым, бо вуліца Савецкая зьяўляецца вуліцай, дзе амаль заўсёды шмат людзей.

 

Пасьля гэтых падзеяў, яшчэ да таго, як стала вядома пра распачацьце адміністратыўнага працэсу супраць а. Віталя, грэка-каталіцкая парафія Маці Божай Жыровіцкай атрымала папярэджаньне з матывіроўкай «за ўдзел сьвятара ў несанкцыянаваных мерапрыемствах».

 

У нас выклікае зьдзіўленьне пасьпешнасьць, з якой было вынесенае папярэджаньне, яшчэ да прызнаньня вінаватым а. Віталя Быстрова.

 

Ня меншае зьдзіўленьне выклікае факт вынясеньня папярэджаньня парафіі ў Івацэвічах за дзеяньні, якія адбывалсія ў Берасьці. Асобна варта падкрэсьліць, што а. Віталь не прыпісаны да кліру Івацэвіцкай парафіі, што яшчэ больш паглыбляе абсурднасьць сітуацыі.

 

Засмучае таксама факт вынясеньня папярэджаньня парафіі за дзейнасьць фізічнай асобы, што мае прыкметы ўвядзеньня практыкі калектыўнай адказнасьці.