29.04.2022

 

 

Нейкіх дадатковых падрабязнасьцяў прычыны адстаўкі 68-гадовага грэка-каталіцкага мітрапаліта, які яшчэ не дасягнуў пенсійнага ўзросту 75 гадоў, прэс-служба Ватыкану не падае.

 

Славацкі грэка-каталіцкі архібіскуп Прэшаўскі Ян Бабяк у сваім звароце з нагоды сваёй адстаўкі напісаў: «Я сыходжу дзеля міру і дабра Царквы, біскупаў, сьвятароў і вернікаў». Вядома, што Папа Францішак прымаў мітрапаліта Славацкай ГКЦ sui iuris (свайго права) Яна Бабяка на асабістай сустрэчы ў Ватыкане на пачатку лютага 2022 году. Тады Ватыкан таксама не агучыў нагоду аўдыенцыі. Папа Францішак падчас свайго апостальскага падарожжа ў Славакію ў верасьні 2021 году адслужыў з мітрапалітам Янам Бабякам урачыстую Боскую літургію ў візантыйскім абрадзе. Неафіцыйна сярод славацкага духавенства выказваецца меркаваньне, што нечаканая датэрміновая дабраахвотная адстаўка архібіскупа Яна Бабяка стала рэакцыяй на вынікі дзьвюх ватыканскіх візітацыяў у архіяпархіі ў 2019 і 2021 гадах. Пэўная частка духавенства і вернікаў выказвала незадаволенасьць ягоным спосабам кіраваньня.

 

Архібіскуп Ян Бабаяк, прымаючы пасьля малітваў і духоўнага разважаньня рашэньне аб адмове ад пасады мітрапаліта, падзякаваўшы Богу за гады свайго служэньня Царкве і ўсе зробленыя ў гэты час добрыя справы, напісаў: «Калі я быў недастаткова чулы да кагосьці падчас сваёй актыўнай службы і не апраўдаў іх чаканьняў, прабачце і даруйце мне. Я старанна працаваў і ніколі не клапаціўся ні пра што, акрамя дабра нашай Грэка-Каталіцкай Царквы. Я таксама ўсім дарую».

 

Прызначаны Рымскім Архірэем Апостальскі адміністратар Прэшаўскай архіяпархіі Браціслаўскі біскуп Пётар Руснак з нагоды свайго новага заданьня сказаў: «Прашу вернікаў аб малітве, каб я мог выконваць служэньне адміністратара». Ён будзе часова кіраваць архіяпархіяй да прызначэньня новага архібіскупа.

 

Варта таксама адзначыць, што славацкія грэка-католікі ў цяперашні час маюць вельмі нетыповую сітуацыю. У іх ёсьць толькі два дзейныя біскупы — архібіскуп Цырыл Васіль, SJ і біскуп Пётар Руснак.

А яшчэ ёсьць тры біскупы на адпачынку: архібіскуп Ян Бабяк, SJ, біскуп Мілан Хаўтур, CSsR і біскуп Андрэй Пацак, CSsR. З Славакіі таксама паходзяць біскуп Ладзіслаў Гучка, які ўзначальвае Апостальскі экзархат Грэка-Каталіцкай Царквы ў Чэхіі, і біскуп Мілан Лах, SJ — кіруючы біскуп Пармскай грэка-каталіцкай япархіі ў ЗША.

 

Славацкі архібіскуп Прэшаўскі Ян Бабяк SJ 14 гадоў кіраваў Славацкай Грэка-Каталіцкай Царквой. Нагадаем, 30 студзеня 2008 году ў Ватыкане было абвешчана пра важныя зьмены ў жыцьці Грэка-Каталіцкай Царквы ў Славакіі. Да таго часу там існавалі дзьве незалежныя структуры для католікаў візантыйскага абраду — Прэшаўская япархія і Апостальскі экзархат у Кошыцах. Згодна з рашэньнем Папы Бенядыкта XVI Прэшаўская япархія была ўзьнята да ўзроўню архіяпархіі з рэзідэцыяй мітрапаліта, а Кошыцкі экзархат, узьняты да годнасьці япархіі, разам з новастворанай Браціслаўскай япархіяй увайшлі ў склад новастворанай мітраполіі.

 

Уладыка Ян Бабяк стаў першым архібіскупам Прэшаўскім і мітрапалітам у Славацкай Грэка-Каталіцкай Царкве sui iuris (свайго права). Яго ўрачыстая інтранізацыя адбылася 17 лютага 2008 году ў Прэшаве.

 

Ян Бабяк на працягу 19 гадоў быў старшынём Падкамітэту па навакольным асяроддзі пры Канферэнцыі біскупаў Славакіі. З 2003 па 2009 год як біскуп ён таксама адказваў за Радыё «Lumen».

 

Падчас свайго служэньня на мітрапалічым пасадзе архібіскуп Ян Бабяк асабліва актыўна павялічваў два месцы марыйнага паломніцтва Прэшаўскай архіяпархіі – Люціна і Літманова.

 

Вялікую ўвагу архібіскуп Ян Бабяк таксама надаваў грэка-каталіцкаму тэалагічнаму факультэту Прэшаўскага ўніверсітэту, у якім падчас яго служэньня была праведзена комплексная рэканструкцыя інтэр’еру, што дазволіла яму стаць сучасным тэалагічным факультэтам XXI стагоддзя. 28 кастрычніка 2014 году па просьбе архібіскупа і пры захаваньні строгіх крытэраў факультэт быў прыняты ў саюз царкоўных факультэтаў, акрэдытаваных Кангрэгацыяй каталіцкай адукацыі (семінарыя і навучальныя інстытуты).

 

Уладыка Ян Бабяк за сваё больш чым 19-гадовае біскупскае служэньне высьвяціў 176 сьвятароў, а за час яго кіраваньня ў Прэшаўскай архіяпархіі было пабудавана 35 новых цэркваў, 53 парафіяльныя будынкі і 9 капліц.