03.06.2014

 

 

У сумеснай дэкларацыі гаворыцца, што сустрэча паміж “біскупамі Цэркваў Рыму і Канстанцінопаля” зьяўляецца “крыніцай глыбокай духоўнай радасьці” і плёнам Божага Провіду. Папа і Патрыярх “з нецярпеньнем чакаюць таго дня”, калі дзьве Царквы будуць “сумесна ўдзельнічаць у Еўхарыстычнай Вячэры”. Гэтага можна асягнуць “праз вызнаваньне адзінай веры, пастаянную малітву, унутранае навяртаньне, абнаўленьне жыцьця і братэрскі дыялог”. Прычым, мэтай багаслоўскага складніка дыялогу не павінен быць пошук нейкага кампрамісу, але паглыбленьне разуменьня ўсёй праўды, якую Ісус Хрыстос даў сваёй Царкве.

 

У дэкларацыі гаворыцца, што дзьве Царквы “абавязаныя даць сумеснае сьведчаньне Божай любові да ўсіх людзей”, працуючы разам “у абароне годнасьці чалавечай асобы на кожным этапе яе жыцьця і сьвятасці сям’і, заснаванай на сужэнстве”. Трэба сумесна вырашаць пытаньні голаду, беднасьці, непісьменнасьці, несправядлівага разьмеркаваньня рэсурсаў, неадказных адносінаў да планеты.

 

Супольныя намаганьні хрысьціянаў патрэбныя таксама і ў абароне “публічнага вызнаваньня сваёй веры”. “У гэтым сьвятым горадзе Ерусаліме мы выказваем нашую глыбокую заклапочанасьць агульнай сітуацыяй хрысьціянаў у краінах Блізкага Ўсходу і іх правам заставацца паўнапраўнымі грамадзянамі на сваіх радзімах”, — адзначылі Францішак і Барталамей І. Яны выказалі перакананьне, што “праз сумеснае сьведчаньне Добрай Навіны Евангельля” дзьве Царквы разам “змогуць быць здольнымі дапамагчы людзям нашага часу нанова адкрыць для сябе шлях, які вядзе да ісьціны, справядлівасьці і міру”.