14.10.2016

 

 

У ім прадстаўнік Сьвятога Айца ў Беларусі адзначыў каштоўнасьць Уніі і яе гістарычнае значэньне. Архібіскуп Габар Пінтэр заклікаў беларускіх вернікаў нанова адкрыць для сябе духоўнае і культурнае багацьце прыналежнасьці да адзінай Царквы. Ніжэй падаем тэкст гэтага ягонага пасланьня.

 

 

 

 

 

 

Дарагія браты і сёстры ў Хрысьце!

 

Набліжаеца да завяршэньня Юбілейны год Божай Міласэрнасьці. Кожны католік павінен задумацца над тым, як выкарыстаць ласку Юбілею, як разьвівацца на шляху жывой веры, трывалай надзеі і дзейснай любові, як у сёньняшнім сьвеце быць верагодным і нястомным сьведкам Хрыста Пераможцы, Які жыве ў адзінай, сьвятой, каталіцкай і апостальскай Царкве.

 

На працягу гэтага году грэка-каталіцкія супольнасьці ў Беларусі з крэатыўнай адвагай крочылі шляхамі Надзвычайнага Юбілею Божай Міласэрнасьці. Натхнёныя ўчынкамі міласэрнасьці яны рэалізавалі багатую на падзеі пастаральную праграму. Гэтая праграма рэалізавалася ў кантэксьце радаснага вызнаваньня веры: «Веру ў адзіную, сьвятую, каталіцкую і апостальскую Царкву».

 

Гэтыя словы Сымбаля веры зьяўляюцца асабліва актуальнымі ў дні, калі грэка-каталіцкія вернікі Беларусі перажываюць чарговую гадавіну падпісаньня Берасьцейскай уніі. Сінод, які праходзіў з 16 па 18 кастрычніка 1596 году, спрычыніўся да аднаўленьня поўнай еднасьці розных царкоўных супольнасьцяў гэтай зямлі з Апостальскім Пасадам у Рыме, заахвочваючы вернікаў да ўзрастаньня ў веры, надзеі і любові ў той складаны перыяд.

 

Берасьцейская унія прывяла да ўмацаваньня духоўнага і культурнага абмену паміж хрысьціянамі з Усходу і іх братамі на Захадзе, што ў сваю чаргу спрычынілася да росквіту культуры, выхаваньня і архітэктуры. Да сёньняшняга дня сьведкамі гэтай падзеі зьяўляюцца некаторыя сьвятыні і шматлікія іконы, напісаныя ў перыяд пасьля падпісаньня Уніі. Гэта каштоўная духоўная спадчына ў гісторыі Царквы ў Беларусі.

 

Сёньня, 420 гадоў пасьля падпісаньня Берасьцейскай уніі, мы маем магчымасьць нанова адкрыць для сябе гэтае духоўнае і культурнае багацьце нашай прыналежнасьці да адзінай, сьвятой, каталіцкай і апостальскай Царквы, усьведамляючы сабе адказнасьць быць сьведкамі Евангельля любові для кожнага чалавека.

 

У гэтыя ўрачыстыя дні, дзякуючы Богу за Яго бязьмежную любоў, заклікаю да малітвы аб будаваньні еднасьці паміж хрысьціянамі так, як гэтага прагне наш Госпад.

 

Даручаю ўсіх вас Марыі — Маці Адзінай Царквы і ад шчырага сэрца бласлаўляю.