04.06.2020

 

 

«З поглядам, скіраваным да гарызонту Юбілею 2000-годдзя, ён хацеў, каб уваходзячы ў трэцяе тысячагоддзе, Царква мела перад вачыма палымяную малітву Свайго Госпада і Настаўніка: “Каб усе былі адно” (Ян 17, 21)», — так Сьвяты Айцец Францішак тлумачыць матывы аднаго з сваіх папярэднікаў, які напісаў гэтую энцыкліку, якая «ў незваротны спосаб» пацьвердзіла экуменічнае заангажаваньне Каталіцкай Царквы. Другі Ватыканскі сабор прызнаў, што экуменічны рух паўстаў дзякуючы ласцы Сьвятога духа, нагадвае Папа. Публікуючы гэтую энцыкліку ва ўрачыстасьць Узьнясеньня, Ян Павел ІІ прапанаваў яе пад знакам Сьвятога Духа, Які ёсьць «будаўніком еднасьці ў разнастайнасьці». «У такім самым літургічным і духоўным канктэксьце мы яе ўзгадваем і нанова прапануем Божаму народу», — адзначыў у сваім пасланьні Францішак.

 

 

«У гэты юбілей, узношу падзяку Госпаду за шлях, які Ён дазволіў прайсьці нам як хрысьціянам у пошуку поўнай еднасьці. Таксама і я падзяляю здаровую нецярплівасьць тых, хто часам думае, што мы можам і павінны прыкладаць яшчэ больш намаганьняў», — прызнаўся Сьвяты Айцец.

 

Папа заўважыў, што на працягу апошніх гадоў было зроблена шмат для таго, каб залячыць раны, якія існавалі на працягу стагоддзяў і нават тысячагоддзяў, для росту ўзаемнага пазнаньня і павагі, для пераадоленьня глыбока ўкаранёных стэратыпаў і забабонаў. Ён зьвярнуў увагу на разьвіцьцё тэалагічнага дыялогу і розных формаў супрацоўніцтва ў дабрачыннай, душпастырскай і культурнай сферах. Сьвяты Айцец згадвае пры гэтым «улюбёных братоў, што стаяць на чале розных хрысьціянскіх Цэркваў і супольнасьцяў», і пра ўсіх братоў і сёстраў кожнай хрысьціянскай традыцыі, якія ёсьць «нашымі спадарожнікамі на шляху».

 

«Падобна як вучні з Эмаўса, мы можам адчуваць прысутнасьць уваскрослага Хрыста, Які крочыць побач з намі і тлумачыць нам Сьвятое Пісаньне, а таксама дазваляе распазнаваць Яго ў ламаньні хлеба, у чаканьні таго, што зможам разам разьдзяліць еўхарыстычную Вячэру», — напісаў Францішак.

 

Сьвяты Айцец высока ацаніў дзейнасьць супрацоўнікаў Папскай Рады па спрыяньні еднасьці хрысьціянаў, якія працавалі і працуюць сёньня, каб «падтрымліваць у Царкве жывым усьведамленьне гэтай неад’емнай мэты». У прыватнасьці ён адзначыў два вельмі важныя праекты гэтага ватыканскага дэпартаменту: падрыхтоўку Экуменічнага даведніка для біскупаў, які пабачыць сьвет гэтай восеньню, і заснаваньне новага экуменічнага часопіса «Acta Œcumenica».

 

«На дарозе, якая вядзе да поўнай сулучнасьці, важна памятаць пра пройдзены шлях, але таксама важна ўглядацца за гарызонт, каб разам з энцыклікай «Ut unum sint» задаваць пытаньне: «Quanta est nobis via?», «які яшчэ шлях перад намі?», — перакананы Рымскі Архірэй.

 

Францішак нагадаў, што еднасьць — гэта ня толькі вынік людзкіх высілкаў, але ў першую чаргу — дар Сьвятога Духа. Еднасьць ня прыйдзе як цуд, яна дасягаецца на шляху. «Будзем з даверам прасіць Сьвятога Духа, каб кіраваў нашымі крокамі, каб кожны адчуваў з адноўленым запалам заклік да дзейнасьці на карысьць экуменізму. Няхай Ён натхняе прарочыя жэсты і ўмацоваўвае братэрскую любоў паміж усімі вучнямі Хрыста, “каб паверыў сьвет” (гл. Ян 17, 21) і памнажалася хвала Айцу, Які ёсьць у небе», — закончыў сваё пасланьне Папа.