20.02.2022

 

 

Мэта гэтага дакументу «Il Padre incomprensibile», падпісанага 6 студзеня 1996 году тагачасным прэфектам Кангрэгацыі Ўсходніх Цэркваў кардыналам Акіле Сільвестрыні і сакратаром архібіскупам Міраславам Марусіным, — практычнае прымяненьне літургічных нормаў у сьвятле палажэньняў Кодэксу канонаў Усходніх Цэркваў 1991 году.

 

На сіммпозіюме ў Рыме, арганізаваным Кангрэгацыяй Усходніх Цэркваў у Папскім патрыстычным інстытуце «Augustinianum», Беларускую Грэка-Каталіцкую Царкву прадстаўлялі Апостальскі Візітатар архімандрыт Сяргей (Гаек), ераманах д-р Лявонці Тумоўскі і а. Сяргей Стасевіч з Лондану.

 

Літургічная спадчына хрысьціянскага Усходу зьяўляецца супольным багацьцем католікаў і праваслаўных, якую трэба сьцерагчы і ахоўваць. На гэта ўказаў прэфект Кангрэгацыі Ўсходніх Цэркваў кардынал Леанарда Сандры — паведамляе Vatican News.

 

Адкрываючы сімпозіюм, прэфект Кангрэгацыі Ўсходніх Цэркваў кардынал Леанарда Сандры выказаў трывогу з нагоды існаваньня небясьпекі страты ўсходняй ідэнтычнасьці, асабліва ў сёньняшні час, які характарызуецца вялікімі міграцыямі. Фактычна існуе бесьперапынны паток людзей, якія выязджаюць найперш з краінаў Блізкага Ўсходу на Захад, у краіны, якія лічацца больш гасьціннымі, з пераважна лацінскай традыцыяй, дзе яны зьліваюцца з іншым асяроддзем, у тым ліку царкоўным, і такім чынам страчваюць сваю ідэнтычнасьць.

 

Кардынал Сандры нагадаў, што ўсходнія Каталіцкія Цэрквы належаць пяці ўсходніх літургічных традыцыяў: александрыйскай, канстанцінопальскай (візантыйскай), сіраантыяхійскай, сірыйска-ўсходняй і армянскай. І ўсе яны маюць вялікую каштоўнасьць для Паўсюднай Царквы. У гэтым клопаце Царквы пра гэтую літургічную спадчыну кардынал Сандры адзначыў адказнасьць душпастыраў лацінскай Царквы, якія, сутыкаючыся з мноствам мігрантаў у сваіх краінах, не павінны абмяжоўвацца толькі гарантаваньнем агульнай сьв. Імшы на арабскай мове. Таксама прэфект Кангрэгацыі Ўсходніх Цэркваў заклікаў зьверхнікаў і айцоў Усходніх Цэркваў “не станавіцца залежнымі ад такой формы цэлебрацыі, як лацінская, нібы гэта адзіны – бо датычыць большасьці – узор, да якога трэба імкнуцца”.

 

Паводле словаў ватыканскага ярарха, важным момантам гэтай сустрэчы стаў удзел у ёй архібіскупа Ёва (Геча) — прадстаўніка Канстанцінопальскага патрыярхату, што заахвочвае да адказнай сумеснай працы, каб прадухіліць “небясьпеку страты ўсходняй ідэнтычнасьці”.

 

Напрыканцы ўдзельнікаў Канферэнцыі прыняў на аўдыенцыі Яго Сьвятасьць Папа Рымскі Францішак.

 

У сувязі з падзеямі вакол Украіны ўдзельнікі пленарнай асамблеі Кангрэгацыі Ўсходніх Цэркваў вырашылі напісаць адмысловы зварот, які перадалі Рымскаму Архірэю, у якім заклікаюць лідараў, у чыіх руках лёсы народаў, памятаць аб адказнасьці перад Богам і людзьмі.

Фота: Vatican Media і CNS/Paul Haring.