«Любоў не шукае»

Гэтую цікавую пастаноўку на расейскай мове, якая доўжылася амаль гадзіну, падрыхтавалі евангельскі пастар Аляксандр Вялічка (ён напісаў сцэнар мюзікла) і група моладзі з царквы «Дом Божы» ў Жодзіна.

У мюзікле паказаны пакутлівыя перажываньні і цяжкія пошукі сапраўднае Любові сучаснай моладдзю. Выдатныя тэксты песень для мюзіклу напісалі Кацярына Белая і Валянцін Лугоўскі, а музыку для яго стварылі Віктар Колбун і Ягор Ровін. Да гэтага паказу ў Берасьці мюзікл змаглі пабачыць толькі евангельскія хрысьціяне ў Жодзіна і ў Кобрыні.

Гэтая імпрэза, што адбывалася ў грэка-каталіцкім душпастырскім цэнтры ў калядны час, была скіраваная на ўмацаваньне братэрскіх кантактаў паміж вернікамі розных канфесіяў, для якіх галоўнае ў жыцьці мусіць быць Бог, Які адзіны для ўсіх, і праўдзівая Любоў, якая не шукае свайго, а служыць іншым, каб разам маглі несьці сьвету нашае хрысьціянскае сьведчаньне.

Напрыканцы імпрэзы, якая сама была своеасаблівым калядным падарункам, браты пяцідзясятнікі падарылі берасьцейскай грэка-каталіцкай парафіі па-мастацку вышытую карціну з выявай Багародзіцы і Дзіцятка Ісуса, зробленую рукамі адной з верніц.